Der Spiegel: Бербок ярим йил Навалнийнинг алмашинувини блоклаган

Германия ва АҚШ расмийлари Алексей Навалнийни ёлланма қотил Вадим Красиковга алмаштиришни режалаштирган эди, бироқ Германия ташқи ишлар вазири Анналена Бербокнинг норозилиги туфайли келишув узоқ муддатга кечиктирилди. Бу ҳақда Der Spiegel журнали 16 феврал, якшанба куни мухолифат етакчиси вафотининг бир йиллиги муносабати билан чоп этилган суриштирувда ёзган.

Бербок Навалнийнинг алмашинувини секинлаштирди

Журналга кўра, Навалнийни чеченистонликни ўлдирганликда айбланиб, Германияда умрбод қамоқ жазосига ҳукм қилинган Красиковга алмаштириш ғояси илк бор 2022 йил ёзи бошида пайдо бўлган. Америкаликларни Россия қамоқларидан озод қилмоқчи бўлган Қўшма Штатлар деярли дарҳол алмашинув лойиҳасига қўшилди. Бир неча маҳбуслар, жумладан Навалний иштирокидаги кенг кўламли алмашинув ғояси Ҳиллари Клинтон томонидан илгари сурилган. Унга собиқ давлат котиби Жон Керри ёрдам берди.

2023 йилнинг апрелида мухолифат етакчисининг рафиқаси Юлия Навалная ва сиёсатчининг ҳамкори Мария Певчих Берлинда Бербок билан учрашган эди. Der Spiegel нашрининг ёзишича, у Навалнийни Красиковга алмаштириш мақсадга мувофиқлигига шубҳа билдирган ва «халқаро ҳуқуқдаги қонунийлик принципи»ни келтириб ўтган. Германия ташқи ишлар вазирлиги раҳбари Красиковнинг озод этилиши Европада янги сиёсий қотилликларга йўл очишидан хавотирда эди. Шунингдек, у Навалний озодликка чиққанидан кейин Россияга қайтиб кетадими ёки йўқми, шуни сўраган. Хотини салбий жавоб берган.

Вашингтонда Бербок алмашинувни қўллаб-қувватлагани ва канцлер Олаф Шолц бу жараённи кечиктириб турганига ишонишган. «Америкаликлар адашди. Навалнийнинг ишини айнан Бербок секинлаштирди», — дея таъкидлайди Der Spiegel.