Германия ташқи ишлар вазири G8 форматини Россия иштирокида қайта тиклашга қарши

Германия ташқи ишлар вазири Анналена Бербок АҚШ президенти Доналд Трампнинг Россияни иқтисодий жиҳатдан энг ривожланган давлатлар норасмий клубига қайтариш ва G8 форматини қайта яратиш таклифига қарши чиқди. Германия дипломатияси раҳбарининг 14 феврал, жума куни айтган сўзларини AFP агентлиги келтирди.

«Катта еттиликдаги ҳамкорлар сифатида биз бу шафқатсиз босқиндан кейин сўнгги уч йил ичида бу Россия билан, Путин Россияси билан нормал ҳамкорлик бўлиши мумкин эмаслигини қайта-қайта аниқ айтдик», — дея таъкидлади Германия ТИВ раҳбари.

«Агар биз ҳаммамиз тинчлик йўлига қайтсак ва бу босқинчилик сиёсати ўзгарса, бу, албатта, биз турли соҳаларда ҳамкорликни қайта тиклашимиз мумкинлигини англатади», — дея давом этди у.

Германия ташқи ишлар вазири Украинадаги «сохта тинчлик» ҳақида огоҳлантирди

Шу билан бирга, Анналена Бербок Украинадаги урушни узоқ муддатга тугатишга чақирди ва «сохта тинчлик» ҳақида огоҳлантирди.

13 феврал куни Оқ уйда журналистлар билан суҳбат чоғида Трамп аввалги формат эҳтимоли ҳақида шундай деди: «Мен уларнинг (Россия Федерацияси вакиллари) қайтишини жуда истардим. Менимча, уларни ҳайдаб чиқариш хато бўлди. Гап менга Россия ёқиши ёки ёқмаслигида эмас. Гап G8'да», — дея унинг сўзларини келтирди Reuters агентлиги. «Мен: «Нима қиляпсизлар? Сизлар Россиядан бошқа ҳеч нарса ҳақида гапирмаяпсизлар, улар эса биз билан столда ўтиришлари керак», дедим. Менимча, Путин қайтиб келган бўларди», деди у.

Россия 1997 йилдан 2014 йилгача "катта саккизлик" аъзоси эди. Бироқ Қрим Россия томонидан қўшиб олинганидан сўнг, бирлашма ўз фаолиятини «катта еттилик» форматида давом эттирди. Унга АҚШ, Буюк Британия, Германия, Франция, Италия, Канада ва Япония киради.