Германия Россиянинг махфий флоти танкерини мусодара қилди

Германия божхоначилари январь ойи ўрталаридан бери Болтиқ денгизидаги Рюген ороли қирғоқларида лангар ташлаб турган Eventin танкерини ҳибсга олди, деб ёзди Der Spiegel.

Нашр маълумотларига кўра, танкер 14 март куни тахминан 40 миллион еврога тенг бўлган 100 минг тоннага яқин нефть юки билан бирга мусодара қилинган. Ҳозир Германия ҳукумати Eventin танкеридан нефтни қандай ва қаерда хавфсиз оқизиш ва танкер билан нима қилиш кераклигини ҳал қилмоқда.

Божхона танкерни мусодара қилишидан олдин, Германиянинг турли хил идоралари ўртасида кеманинг тақдири бўйича қизғин мунозаралар бўлган. Энди ҳукумат қарорига кўра, танкер номи ўзгартирилиши мумкин.

Нашрнинг қайд этишича, мусодара қилиш тўғрисида қарор қабул қилиш билан Германия расмийлари Россия нефтининг Болтиқ денгизи орқали транзитига тоқат қилмаслиги ҳақида сигнал юбормоқда.

Панама байроғи остидаги Eventin танкери 6 январь куни Ленинград вилоятининг Кингисепп туманидаги Уст-Луга портидан чиқиб, Мисрнинг Порт-Саид шаҳрига йўл олган эди. 10 январь куни 2006 йилда қурилган кема Германия қирғоқларида бошқарувни йўқотгани маълум бўлди. Нефть тўкилиши хавфи туфайли у яқин портга тортилди. Февраль ойи охирида Европа Иттифоқи расмийлари танкерни Россия махфий флоти кемаси деб ҳисоблаб, Россияга қарши санкциялар рўйхатига киритди.