Британия Украина учун денгиз дронларини яратиш устида иш олиб бормоқда

Буюк Британия Украина ҳарбийлари фойдаланиши учун мўлжалланган экипажсиз бошқарилувчи иккита денгиз кемасини яратишда иштирок этмоқда. Бу ҳақда мамлакат мудофаа харидлари вазири Мария Игл томонидан парламентга йўлланган мурожаатга таяниб, Naval Technology хабар берди.

4 феврал санаси туширилган мактубда вазир Wasp ва Snapper номли экипажсиз бошқарилувчи денгиз тизимларини яратиш дастурлари устида иш олиб бораётганини маълум қилган. Ушбу лойиҳалар Британия мудофаа вазири Жон Хили томонидан 28 январда ташкил этилган кечки овқатда тилга олинганди.

Мария Иглнинг қайд этишича, Wasp ва Snapper Украинани қўллаб-қувватлаш учун махсус яратиладиган «янги экипажсиз денгиз тизимлари» бўлади. Унинг сўзларига кўра, айни вақтда дронлар якуний тестлардан ўтмоқда.

Буюк Британия Мудофаа вазирлиги Naval Technologyъга (NT) лойиҳалар тўғрисида қўшимча маълумот беришдан бош тортган.

NT’нинг ёзишича, Украина учун бу турдаги кемаларининг яратилиши тўғрисидаги маълумот Киевга Gravehawk зенит-ракета мажмуаларини етказиб бериш бўйича узоқ вақтдан бери расмий хабарлар берилмагани фонида тарқалган. Буюк Британия бош вазири Кир Стармер январ ўрталарида Киевга уюштирган ташрифида ушбу тизимлар топширилишини тасдиқлаган эди. Британия ҳукуматининг сайтида эълон қилинган баёнотга кўра, Gravehawk украин армияси учун қисқа муддатда яратилган, унинг иккита прототипи 2024 йил сентябрда Украинада синовдан ўтказилган.

GlobalData томонидан ўтказилган таҳлилларга кўра, экипажсиз бошқариладиган сувости ва сувусти аппаратларининг ривожланиши денгизлардаги жанг ҳаракатларини бутунлай ўзгартириб юборади. Нашр бунга мисол сифатида Украина Россиянинг Қора денгиз флотига қарши фойдаланаётган денгиз дронларини келтирган. Улар ёрдамида Қора денгиз флотининг 30 фоиздан ортиғига жиддий шикаст етказилган ёки йўқ қилинган.