Британия Россиянинг музлатилган активларидан Украинага биринчи миллиард долларни тақдим этди

Украина Буюк Британиядан Россиянинг музлатилган активларидан тушган даромад билан таъминланган биринчи траншни қабул қилиб олди. Бу ҳақда мамлакат бош вазири Денис Шмигал маълум қилди.

Қайд этилишича, Extraordinary Revenue Acceleration for Ukraine (ERA) дастури доирасида Киевга 752 миллион евро (қарийб 971 миллион доллар) ўтказилган.

Шмигал маблағлар Украина мудофаа қобилиятини мустаҳкамлашга йўналтирилишини маълум қилиб, «Россия пулларини Украина учун ишлашга мажбур қиладиган механизм» учун «катта еттилик»даги шерикларига миннатдорчилик билдирди.

Бош вазир Киев Россиянинг барча суверен активлари келажакда мусодара қилиниб, Украина фойдаси учун берилишига умид қилишини қўшимча қилди.

G7 давлатлари Россия Марказий банкининг Ғарбда музлатилган маблағларини фойдаланишдан келадиган даромаддан Украинага 50 миллиард доллар кредит ажратишга келишиб олган. Россиянинг музлатилган маблағларининг аксарияти (умумий сумма 260 миллиард евродан ошади) Белгиянинг Эуроcлеар депозитарийларида сақланади. Ғарб давлатлари ушбу маблағлардан фойдаланиш масаласини бир неча бор муҳокама қилган, аммо якунда юридик жиҳатдан активларнинг ўзини мусодара қилиш мумкин эмас, деган хулосага келган.

2024 йил декабр ойида Украина АҚШдан Россиянинг музлатилган активларини фойдаланишдан келиб тушган даромадлар ҳисобидан биринчи миллиард долларни қабул қилганди. Режага кўра, Вашингтон Киевга 50 миллиард долларнинг 20 миллиардини тақдим этиши керак.