Time муқовасига президент курсисида ўтирган Илон Маск сурати жойлаштирилди

Журналнинг америкалик миллиардер ҳақидаги мақоласида унинг USAID’га қарши «салб юриши» баён қилинган.

Time журнали SpaceX асосчиси Илон Маскнинг АҚШ президенти столи ортидаги курсида ўтирган ҳолда тасвирланган суратини ўз муқовасига жойлаштирди.

«Илон Маскнинг Вашингтон билан уруши ичида» сарлавҳали мақолада Маск раҳбарлик қилаётган Ҳукумат самарадорлиги департаментининг (DOGE) АҚШ Халқаро тараққиёт агентлигига (USAID) қарши «салб юриши» баён қилинган.

Time’нинг ёзишича, DOGE аллақачон Рақамли хизматни эгаллаган ва кадрлар ресурслари бўйича федерал департаментда плацдарм яратган, Маск эса «ҳеч қандай қаршиликка тоқат қилмаслигини кўрсатган».

Журналнинг қайд этишича, Маск афтидан унга «ҳукуматни ўз кун тартибига мослаштириш учун кенг қамровли мандатни» топширган президент Доналд Трампдан бошқа ҳеч кимнинг олдида жавобгар эмас.

Маскнинг ҳаракатлари Демократик партия вакилларининг қаршилигини юзага келтирди — ва бу «уруш ҳукуматнинг келажаги ҳамда ундаги кучлар мувозанатини белгилаб бериши мумкин», деб ёзади Time.

Эслатиб ўтамиз, 2024 йил ноябрида Доналд Трамп тадбиркор Илон Маскни DOGE раҳбари этиб тайинлаган эди. DOGE «ҳар йили 6,5 миллиард долларлик давлат харажатларида мавжуд бўлган катта исрофгарчилик ва фирибгарликни йўқ қилади», деган эди ўшанда Трамп. Унинг сўзларига кўра, департамент Оқ уйнинг бюджет идораси билан ҳамкорлик қилади ва «маслаҳат ва кўрсатмалар беради».

#Илон Маск #Time