ОАВ: Януковичнинг ўғли босиб олинган ерлардан олинган кўмир савдоси билан шуғулланяпти

Украина собиқ президенти Виктор Януковичнинг ўғли Александр Янукович Россия томонидан босиб олинган Украина ҳудудларидан кўмир сотишдан ўзига яқин компаниялар орқали миллиардлаб рубл ишлаб топяпти. Бу ҳақда 4 феврал, сешанба куни чоп этилган «Важные истории» нашри суриштирувида айтилган. Журналистлар аниқлаганидек, 2023-2024 йилларда кичик Янукович билан боғлиқ тузилмалар Россиядан деярли ярим миллион тонна кўмир экспорт қилган. Хомашё учун пул Британия Виржиния оролларидаги офшор ҳисобрақамларига ўтказилган, кўмирнинг ўзи эса Туркия ва бошқа мамлакатларга жўнатилган.

Схеманинг асосий элементи Ростов-Дон чеккасида рўйхатдан ўтган ва Донецк областидаги фирмалардан экспорт учун кўмир оладиган «Энергоресурс» компаниясидир, деб ёзади «Важные истории». Унинг етказиб берувчилари қаторига «Донские угли» савдо уйи, «Востокуголь» РТК ҳамда «Комсомолец Донбасса», «Ждановская», «Импэкс-Дон» ва бошқа конлар киради.

"Энергоресурс" эгаси ва директори сифатида Александр Януковичнинг собиқ қўл остидагилари — Алексей Иванов ва Павел Земляковлар кўрсатилган. Иванов у билан боғлиқ бўлган турли юридик фирмаларда ишлаган, Земляков Донбасс ҳисоб-китоб-молия марказида хизмат қилган, Украина оммавий ахборот воситалари у ҳам собиқ президентнинг ўғлига тегишли эканини билдирган. 2023 йилда "Энергоресурс" Кипрнинг Sl holdings limited компаниясидан йилига 1 фоиз ставка билан 7 миллион доллар кредит олди, бу компания Януковичнинг "МАКО" ҳолдингидаги яна бир қўл остидаги ходими Эдуард Слинкога тегишли эди.

"Энергоресурс"нинг деярли барча кўмирлари Туркияга кетади

Европа Иттифоқи санкциялари туфайли сўнгги уч йил ичида "Энергоресурс" кўмири асосан Туркияга жўнатилди, у ерга темирйўли ва денгиз транспорти орқали етказилади. Қабул қилувчи — Британия Виржиния оролларида рўйхатдан ўтган Energy Union компанияси. "Энергоресурс" унга кўмирни оддий нархда сотади — 2024 йилда бир тонна учун ўртача 5700 рубл. «Паст нарх экспорт божларини тежаш имконини беради, кейин Energy Union уни исталган жойда ва исталган нархда сотиши мумкин. Бундай схема фақат ушбу компаниялар бирлашган бўлса, мантиқий бўлади », деб ёзади «Важные истории».

2022 йилгача Болгария, Эстония, Чехия ва Руминия "Энергоресурс"дан кўмир сотиб олувчилар қаторида эди. Журналистларнинг ҳисоб-китобларига кўра, компания 2021-2023 йилларда 3,5 миллиард рубл даромад олди.