«Болага билим бериш билан шуғулланмасак, косамиз оқармайди» — Эркинжон Турдимов

Сирдарё вилояти ҳокими вазифасини бажарувчи Эркинжон Турдимов ҳам халқнинг «косаси оқариши» учун нималар қилиш кераклиги ҳақида гапирди.

«Сирдарёмиз яхши бўлиши учун нима қилиш керак? Бугун уйимизга бориб, «кел қани, ўқитувчимиз сенга нима уй вазифаси берди?», деб унинг тарбияси билан шуғулланишимиз керак. Биз бугун, эртага яхши яшамоқчи бўлсак, ҳозир мен айтган гапларга ҳаракат қилишимиз лозим. Ким ҳаракат қиладиган бўлса, биз ўшанга кўмакдош бўламиз. Ўзи ҳаракат қилган одамга беришимиз керак», — дейди Турдимов.

Сирдарё ҳокими болага эътибор қаратилмаса, эртага азоб-уқубатини тортишга тўғри келиши айтиб, унга рус, инглиз ва бошқа хорижий тилларни ўргатиш кераклигини таъкидлади.

«Бизни тарбияланган, касб олган, тилни билган фарзанд қутқаради. Эртага хоҳлаган институтига кириб кета олади, энг яхши ишлар ҳам ўша боланики бўлади… Бугун болага фақат билим бериш билан шуғулланмайдиган бўлсак, косамиз оқармайди, биримиз икки бўлмайди… Ақлни ишлатадиган бўлсак, энг кўп ойлик оладиган, энг яхши ишлар бизники бўлади», — дея қайд этади Эркинжон Турдимов.

Аввалроқ «Миллий тикланиш» партияси етакчиси, депутат Алишер Қодиров «газни уй иситиш ва овқат пиширишга ишлатиб юборадиган халқнинг косаси оқармайди» дея ёзиб тармоқларда кўплаб муҳокамаларга сабаб бўлганди.

Эслатиб ўтамиз, январ охирларида Ўзбекистон президентининг фармони билан Эркинжон Оқбўтаевич Турдимов Сирдарё вилояти ҳокими вазифасини бажарувчи этиб тайинланганди. Сирдарё вилоятига 2022 йил 26 ноябрдан буён Акмалжон Маҳмудалиев раҳбарлик қилаётганди, у 2024 йил 16 январ куни инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани учун ишдан олинган эди.