Швеция махсус хизмати Болтиқ денгизидаги кабел шикастланишини текширмоқда

Болтиқ денгизида Латвия ва Швециянинг Готланди ўртасидаги оптик толали алоқа кабелига зарар етказганликда гумон қилинаётган Vezhen кемасининг эгаси Ҳонгконгда рўйхатдан ўтган Hai Kuo Shipping 2015B Limited компаниясидир. Бу ҳақда 27 январ, душанба куни MarineTraffic сайти ва Финландиянинг Helsingin Sanomat (HS) газетаси хабар берди.

Малта байроғи остидаги Vezhen Россиянинг Ленинград области Уст-Луга портидан олтингугурт юки билан сузиб кетаётган эди. Унинг оператори Болгариянинг энг йирик транспорт компанияси Navibulgar - Болтиқбўйи ва Халқаро денгиз кенгаши BIMCO аъзоси.

Швециянинг Aftonbladet газетаси аниқлик киритишича, кема 24 январ куни Уст-Луга портини тарк этган. Швеция Соҳил хавфсизлик хизматининг KBV 033 кемаси Vezhen'ни Швеция сувларига кузатиб қўйди, у Карлскрона порти яқинида лангар ташлади.

Тергов Швеция Давлат хавфсизлик хизмати томонидан олиб борилмоқда

Жиддий диверсия гумони юзасидан дастлабки тергов Швеция Давлат хавфсизлик хизмати (SÄPO) томонидан олиб борилмоқда. Терговда бир қанча идоралар, жумладан, Миллий полиция кенгаши, Соҳил хавфсизлик хизмати ва Швеция Қуролли кучлари иштирок этмоқда. «Айтишим мумкинки, Швеция расмийлари ҳозир ушбу воқеани тергов қилиш учун биргаликда ишламоқда», деди катта прокурор Матс Люнгквист.

«Операция давом этмоқда ва ҳукумат воқеалар ривожини диққат билан кузатиб бормоқда ҳамда тегишли органлар билан алоқада», — деди Швеция бош вазири Улф Кристерссон.

Латвия давлат радио ва телевидение маркази аввалроқ Вентспилсни Швециянинг Готланд ороли билан боғловчи кабелда маълумотлар узатилишида узилишлар ҳақида хабар берган. Кабелни таъмирлаш бўйича чоралар кўрилаётганда муқобил маълумот узатиш йўллари қўлланилади.

Латвия бош вазири Эвика Силина X ижтимоий тармоғида унинг ҳукумати «швед иттифоқчилари ва НАТО билан ҳодисани текшириш, жумладан, ҳудудни патрул қилиш, шунингдек, кемаларни текшириш учун иш олиб бораётганини» ёзди.