Краснодарда учта ресторан ёқиб юборилди. Полиция Украинани айбламоқда

Краснодар марказида учта ресторан ёниб кетди. Полиция 19 ёшли йигитни ўт қўйишда айбламоқда. У «украиналик мутахассис»нинг буйруғини бажарганини айтди.

Фото: Telegram / tipichkras

25 январ, шанба куни кечқурун Краснодар марказида учта ресторан ёниб кетди. Маҳаллий полициянинг айтишича, ўт қўйган шахс телефон фирибгарлари томонидан нишонга олинган 19 ёшли бола бўлган. У ўз навбатида маълум бир «украиналик мутахассис»нинг буйруғини бажарганини айтди.

Бир соат ичида учта ресторан ёниб кетди

"Кубань 24" телеканали хабар беришича, учта ресторан ҳам бир-бирига яқин жойда жойлашган ва бир соат ичида ёниб кетган. Аввалига шаҳар марказидаги Красная кўчасида жойлашган "МясоLove" ресторанида ёнғин чиққан. Воқеа гувоҳларининг 93.ru Telegram-каналига маълум қилишича, бинога ниқобли эркак кириб, рюкзак улоқтирган ва у дарҳол ёниб кетган. 50 га яқин одам эвакуация қилинган. Воқеа жойига тезда етиб келган ўт ўчирувчилар ёнғинни ўчиришди.

Орадан 20 дақиқа ўтгач, "МясоLove"дан 350 метр узоқликдаги Северная кўчасида "Гусь" ресторани ёниб кетди. Ўт ўчирувчилар етиб келгунига қадар ёнғин ўчирилди. 37 киши эвакуация қилинди. Яна 40 дақиқадан сўнг "Гусь"дан 600 метр узоқликдаги Красная кўчасида жойлашган "Бумбараш" номли учинчи муассаса ёниб кетди. Ёнғин 10 дақиқа ичида, ўт ўчирувчилар етиб келгунига қадар ўчирилди. 15 киши эвакуация қилинган.

Ички ишлар вазирлиги: Ёнғинларни «украиналик мутахассис» келтириб чиқарган

Россия Ички ишлар вазирлигининг Краснодар ўлкаси бўйича бош бошқармаси 26 январ, якшанба куни эрталаб ўт қўйган шахсни аниқлагани ҳақида хабар берди. У Краснодар ўлкасининг Динский районида яшовчи 19 ёшли йигит бўлиб, «аккаунти бузиб кирилиб, шахсий маълумотларидан фойдаланиш билан қўрқитилган, у номаълум шахслар кўрсатмаси билан ўт қўйган», — деди кучишлатар тизим ходимлари.

Уларнинг сўзларига кўра, йигитни ресторанлардан бирининг ходимлари қўлга олган. Улар «Бумбараш» ходимлари бўлган, деб ёзади 93.ru Telegram-канали.

Тўрт соатдан кейин полиция ресторанга ўт қўйиш ҳолатларини камера олдида тан олган ва Украина бунда иштирок этганини даъво қилган ёш йигитнинг видеосини эълон қилди. Ёзувда қўлга олинган шахс учинчи ресторан номини нотўғри талаффуз қилади ва «Мени украиналик мутахассис юборган» иборасидан сўнг видеодаги овоз бир неча сония давомида йўқолади. Кейин йигит унга 35 минг рубл ва қочиш имконияти ваъда қилинганини айтади. Ички ишлар вазирлиги ишни терговчиларга топширганини маълум қилди.

#Краснодар #ресторан