2024 йилда мансабдор шахсларнинг жиноят содир этиш ҳолатлари кескин кўпайди

2024 йилда жиноят содир этган мансабдор шахсларнинг сони кескин ошган. Бу ҳақда Бош прокуратура хабар бермоқда.

2024 йилда мансабдор шахсларга нисбатан 3 821 та жиноят иши қўзғатилган. Уларда 4 906 нафар мансабдор шахс жавобгарликка тортилган.

2023 йилда мансабдор шахсларга нисбатан 3 412 та жиноят иши қўзғатилган. Уларда 3 575 нафар мансабдор шахс жавобгарликка тортилган.

Ўтган йилда жавобгарликка тортилган мансабдор шахсларнинг мавқейи қуйидагича бўлган:

• республика миқёсидаги ходимлар – 71 нафар;
• вилоят миқёсидаги ходимлар – 410 нафар;
• туман (шаҳар) миқёсидаги ходимлар – 4 425 нафар.

2023 йилда жиноят содир этган республика миқёсидаги ходимлар сони 49 нафар, вилоят миқёсидаги ходимлар 267 нафар, туман (шаҳар) миқёсидаги ходимлар 3 259 нафар бўлган.

Жавобгарликка тортилган мансабдор шахслар содир этган жиноят турлари қуйидагича бўлган:

• ўзганинг мулкини ўзлаштириш ёки растрата йўли билан талон-торож қилганлар – 2 929 нафар (2023 йилда 2 205 нафар бўлган);
• пора олган ва берганлар, пора олди-бердисида воситачилик қилганлар – 353 нафар (2023 йилда 195 нафар бўлган);
• фирибгарлик қилганлар – 447 нафар (2023 йилда 272 нафар бўлган);
• мансаб ваколатини суиистеъмол қилганлар – 226 нафар (2023 йилда 397 нафар бўлган);
• ҳокимият ёки мансаб ваколати доирасидан четга чиққанлар – 13 нафар (2023 йилда 30 нафар бўлган);
• мансаб сохтакорлигига йўл қўйганлар – 13 нафар (2023 йилда 36 нафар бўлган);
• мансабга совуққонлик билан қараганлар – 40 нафар (2023 йилда 25 нафар бўлган);
• бошқа жиноятларни содир этганлар – 885 нафар (2023 йилда 415 нафар).