Зеленский: АҚШнинг Украинага кўрсатаётган ҳарбий ёрдами тўхтагани йўқ

АҚШ Украинага ҳарбий ёрдам кўрсатишни давом этмоқда. Бу ҳақда Володимир Зеленский Давлат департаменти бошқа мамлакатларга ёрдам дастурини 90 кунга тўхтатгани ҳақидаги хабарларга берган изоҳида маълум қилди.

Зеленскийнинг сўзларига кўра, у «гуманитар дастурларга 90 кунлик қандайдир чекловлар борлигидан» хабардор.

«Қандайдир чекловлар борлигини биламан, яхшилаб эътибор қаратиш керак. Гуманитар дастурларга 90 кунлик чеклов. Дунёда АҚШ ҳукумати томонидан қўллаб-қувватлаб келинган кўплаб институтлар борлигидан хабардорман... Мен ҳарбий ёрдамга эътироб қаратганман ва у тўхтатилгани йўқ», — дейди у Молдова президенти Майя Санду билан ўтказилган матбуот анжуманида.

Аввалроқ АҚШ давлат котиби Марко Рубио мавжуд чет эл грантларига ажратиладиган харажатларни 90 кунга тўхтатиш бўйича топшириқ берган эди. Бундай қарор Трамп 20 январ куни президентлик лавозимига киришганидан кейин қабул қилинган — барча дастурлар АҚШ ташқи сиёсатига мос келиш ёки келмаслиги ўрганиб чиқилгунга қарад тўхтатилади. Politico нашри Давлат департаментининг қарори Украинага кўрсатилаётган ҳарбий ёрдамларга ҳам таъсир кўрсатиши мумкинлиги ҳақида ёзганди.

Укрианадаги лойиҳаларга масъул бўлган Халқаро тараққиёт агентлиги (USAID) ходимлари барча ишни тўхтатиш бўйича кўрсатма олган. Reuters манбасининг сўзларига кўра, мактаблар ва соғлиқни сақлаш соҳасига оид лойиҳаларни қўллаб-қувватлаш музатилган.