Зеленский Россия билан музокаралар учун шартларни айтди

Украина президенти Володимир Зеленскийнинг айтишича, «Киев Москва билан урушни тўхтатиш бўйича тўғридан тўғри музокаралар «кучли позициядан» олиб бориладиган бўлса, бунга тайёр. Агар АҚШ президенти Доналд Трамп хавфсизлик кафолатларини тақдим этса, бу мумкин, деди у 22 январ, чоршанба куни Bloomberg агентлигига берган интервюсида.

Украина ва тинчликпарвар кучлар учун хавфсизлик кафолатлари

«Агар президент Трамп бизга, Украина учун бу кучли ва қайтариб бўлмайдиган хавфсизликни кафолатлай олса, биз дипломатик йўлдан борамиз. Мен тушунаманки, Россиясиз бу урушни дипломатик йўл билан тўхтатиб бўлмайди», — деди у. Украина учун узоқ муддатли хавфсизлик кафолати НАТОга аъзо бўлиш ёки АҚШ иштирокида Ғарб тинчликпарвар кучларининг мавжудлиги бўлади, деб ҳисоблайди Украина президенти.

Зеленский Украинадаги жанговар ҳаракатлар тугаганидан кейин Россиянинг қайта қуролланишига ва келажакда янги ҳарбий тажовузига йўл қўймасликка чақирди. Унинг сўзларига кўра, энг хавфли сценарий Россия президенти Владимир Путинга урушни қайта бошлаш имконини берадиган тинчлик бўлади. «У президент Трампга кўп нарсаларни ваъда қилади, ҳатто у билан учрашиш учун ҳам у жуда узоққа боради», — дея огоҳлантирди у.

Зеленский, шунингдек, Россия билан музокараларни бошлашнинг адолатли шарти унинг қўшинларини, ҳеч бўлмаганда, 2022 йил февралида Россиянинг тўлиқ миқёсли ҳужуми бошланишидан олдинги чизиққа олиб чиқиб кетиши бўлишига ишонч билдирди.