Samsung ўзининг энг юпқа смартфонини тақдим этди

Асосий Samsung смартфонларидан фарқли ўлароқ ушбу модел иккита орқа камерага эга бўлади.

Samsung компанияси Samsung Galaxy S25 смартфонлари билан бирга мутлақо янги модел — Galaxy S25 Edge’ни эълон қилди.

Смартфон АҚШдаги блогерлар ва журналистлар учун ўтказилган Samsung тақдимотида намойиш этилди. Бироқ гаджетни қўлга олиш ва синаб кўришга рухсат берилмаган. Суратлардан кўриниб турибдики, қурилма ҳақиқатан ҳам юпқа, лекин шу сабабли у фақат иккита орқа камерага эга. Асосий Samsung Galaxy S25 моделларида эса учта камера мавжуд.

Samsung Galaxy S25 Edge корпусининг қалинлиги атиги 6,4 миллиметрни ташкил этиши кутилмоқда. Бу бренднинг энг юпқа флагмани бўлиб, келажакда ишлаб чиқарилиши режалаштирилаётган 5,5 миллиметр қалинликдаги iPhone 17 Slim билан рақобатлашади.

Смартфон нархи ва хусусиятлари эълон қилинмади. Қурилмага Galaxy учун мўлжалланган Snapdragon 8 Elite чипи ўрнатилган. Қайд этилишича, смартфон 2025 йилнинг апрелида сотувга чиқарилади, унга қадар якуний дизайн бироз ўзгартирилиши мумкин.

Samsung’нинг сўнгги Edge смартфонлари 2016 йилда чиқарилганди — Galaxy S7 Edge. У асосий моделдан қирралари эгилган экрани билан фарқланади. Афтидан, бундан кейин моделлар номига қўшиладиган Edge қўшимчаси юпқа гаджетлар учун қўлланади.

#Samsung #смартфон