«Неча марта шартномани бекор қилишни сўраганимни биласизми?» – Катанец мураббийлик фаолиятини якунламоқда

Словения нашрларининг ёзишича, Ўзбекистон миллий жамоаси бошқарувида 2026 йилги жаҳон чемпионатига тўғридан-тўғри йўлланма олишга яқин турган 61 ёшли мутахассис саломатлиги билан боғлиқ сабаблар туфайли қолган 4та расмий ўйинда жамоани бошқара олмаслигини тушунган ва шартномани бекор қилган.

Словениянинг Sportklub сайтининг қайд этишича, Катанец билан бирга унинг ёрдамчилари Алекс Чех, Нихад Пейкович ва Владо Радманович жамоа билан хайрлашади.

Нашр Словения миллий жамоасини ўз тарихида илк Европа чемпионати (2000) ва жаҳон чемпионатига (2022) олиб чиққан мураббий билан суҳбатлашиб, хасталик билан курашаётган мураббийга соғлик тилади.

«Икки ойча аввал ўзимни жуда яхши ҳис қилаётгандим, ҳозир ҳам ёмон эмас, барчаси жойида. Аммо, барибир ўзим истаганимдек эмас. Шу билан бирга тўшакка михланиб қолганим йўқ, ҳали ҳам сайрга, юришга чиқаман. Яратган эгам менга ёрдам бермоқда. Сўнгги вақтларда мен Словения ва Хорватия орасида кўп қатнайдиган бўлдим.

Мураббийлик фаолиятимга келсак, истеъфога чиқиш қарорини фақат ўзим қабул қилдим. Ҳаётим давомида фақат бошқалар учун ҳаракат қилиб, ўзимни фидо қилгандекман. Неча марта шартномани бекор қилишни сўраганимни биласизми? Аммо ҳар сафар бу фикримдан қайтаришган. Аммо бу – мени ишлашга ундаганларнинг айби эмас, фақатгина ўзимнинг бош мураббий сифатидаги масъулиятим эди», - дейди Сречко Катанец интервюсида.

Sportklub сайти мухбирининг Сречкога «футболдаги фаолиятингизга нуқта қўйдингизми?» дея берган саволига Словениянинг афсонавий мураббийи ҳатто эртага нима бўлишини билмаслигини айтиб, мураббийлик фаолиятини якунлаганига шаъма қилган.

Аввалроқ, 61 ёшли мутахассиснинг саратон касаллиги билан курашаётгани ҳақида хабарлар тарқалганди. Tribuna.uz сайти нафақат Словениянинг афсонавий мураббийи, балки Ўзбекистон миллий жамоасининг ҳам энг муваффақиятли хорижлик мураббийига соғлик тилайди.

Эслатиб ўтамиз, 61 ёшли мутахассис 2021 йил кузидан бери Ўзбекистонни бошқариб келаётганди. Унинг қўл остида миллий жамоа Осиё Кубоги-2023да чоракфиналгача етиб борди, ЖЧ-2026 саралашида эса 3-босқичга чиқди ва айни вақтда гуруҳда мундиалга йўлланма берадиган 2-ўринни эгаллаб турибди.