Ўзбекистон экспортда хусусий сектор улушини 60 фоизгача ошириш ниятида

Венгриянинг етакчи Hello Magyar онлайн нашрида Ўзбекистоннинг экспорт салоҳиятига бағишланган мақола эълон қилинди.

Фото: Kun.uz

Унда таъкидланишича, Ўзбекистонда экспортни қўллаб-қувватлаш "Ўзбекистон - 2030" стратегиясида белгиланган - экспортда хусусий сектор улушини 60 фоизга етказиш мақсадларига мувофиқ тарзда тизимли равишда амалга оширилмоқда.

Мақолада 2017 йилдан 2023 йилгача Ўзбекистон экспортининг умумий ҳажми 120 миллиард АҚШ долларни ташкил этгани ҳақида кўрсаткичли маълумотлар келтирилган. Биргина 2023 йилда экспорт ҳажми 24 миллиард АҚШ долларини ташкил этиб, 2017 йилга нисбатан 64 фоизга ошганлиги эътироф этилади.

"Сўнгги олти йил ичида Ўзбекистон ўз экспорти географиясини 33 та янги мамлакатга кенгайтирди ва умумий хорижий бозорлар сонини 115 тага етказди, - дея таъкидлайди Hello Magyar. - Ўзбекистон маҳсулотлари илк бор Перу, Панама, Мексика, Доминикан Республикаси, Аргентина, Албания, Сербия, Финландия, Люксембург ва бошқа мамлакатлар бозорларига чиқди".

Таъкидланишича, сўнгги йилларда экспортни қўллаб-қувватлаш миллий тизимида асосий эътибор корхоналарни экспорт фаолиятига жалб қилишга қаратилмоқда. "Масалан, ўтган йили 3 мингга яқин маҳаллий компания экспорт фаолиятига қўшилди, жорий йилнинг январь-октябрь ойлари оралиғида эса 2450 та компания илк бор ташқи бозорларга чиқиб, 1 миллиард АҚШ долларлик маҳсулот экспорт қилди", - дейилади мақолада.

#экспорт #хусусий сектор