Apple янгиланган iOSʼдан сунъий интеллект асосида ишлайдиган функциясини ўчириб қўйди

Бунга BBC хизматининг шикояти сабаб бўлган. Катта ҳажмли маълумотларни қисқартириб тақдим этишга мўлжалланган функция сарлавҳалар маъносини ўзгартириб юбораётгани аниқланган.

Фото: Shutterstock

Apple BBC шикоятидан кейин сунъий интеллект асосида ишлайдиган Notification Summaries янгиликлардан хабардор қилиш сервиси фаолиятини тўхтатиб қўйди, деб хабар бермоқда The Guardian.

Notification Summaries — бу янгилик ёки катта ҳажмдаги хабарларни сунъий интеллект ёрдамида қисқа кўринишга келтирадиган функция. 2024 йил ноябрда фойдаланувчилар Notification Summaries ёлғон хабарлар бериб, сарлавҳалар маъносини ўзгартириб юбораётганини пайқаб қолган эди.

Декабр ойида BBC Apple компаниясини судга берди. Сунъий интеллект ёрдамида тайёрланган хабар BBC News тиббий суғурта компанияси директори Брайан Томпсонни ўлдиришга айбланаётган Манжоне ўз жонига қасд қилгани тўғрисида мақола эълон қилгандек таассурот уйғотган. Аслида эса бундай бўлмаган.

«Оммавий ахборот воситаларига тегишли нотўғри маълумотларнинг автоматлаштирилган тарзда тақдим этилиши ОАВ обрўсига путур етказади ва аҳолининг долзарб воқеалар ҳақида ишончли маълумот олиш ҳуқуқига таҳдид солади», — дейилган эди мурожаатда.

Буюк Британия журналистлар миллий иттифоқи сервис мавжуд ёлғон маълумотларни тарқатиб юборишга хизмат қилмаслиги учун уни ўчириб ташлашга чақирган. Apple компанияси мазкур ҳолатга муносабат билдириб, Notification Summaries функцияси iOS 18.3 янгиланишида ўчириб қўйилишини маълум қилди.

Notification Summaries функцияси Appleʼнинг сунъий интеллектни жорий этиш бўйича Apple Intelligence стратегиясининг бир қисми эди.

iOS 18.3 янгиланиши 16 январ куни тадим этилди. У Америка техногигантининг 2025 йилдаги операцион тизимини биринчи муҳим янгиланиши деб атамоқда. Асосий ўзгаришлар хатоликларни тўғирлаш ва операцион тизим билан ўзаро алоқа қулайлашиши учун айрим муҳим функцияларни қайта созлаш бўлди.

#Apple #сунъий интеллект #BBC