Apple янги MacBook Air ноутбукини тақдим қилди

Қурилма M4 процессори, янгиланган дисплей ва камерага эга бўлди.

Фото: Apple

Apple компанияси M4 чипи билан жиҳозланган MacBook Air ноутбукининг янги версиясини тақдим этди. Ташқи томондан ноутбук ўзгармади, аммо янгиланган аппарат юқори самарадорликни таъминлаши керак. Процессордан ташқари, қурилма бир нечта афзалликларга ҳам эга бўлди, жумладан, янгиланган дисплей ва камера.

M4 чипи ўрнатилган MacBook Air нанотекстурали дисплейга эга бўлиб, илгари бу фақат Pro моделларида мавжуд эди. Ушбу қоплама ёрқинликни камайтиради ва ёруғ шароитда кўринишни яхшилайди. Камера ҳам янгиланди, энди у Center Stage функциясига эга 12 мегапикселли модул бўлиб, камерага видеоқўнғироқлар вақтида фойдаланувчини автоматик равишда кузатиш имконини беради.

Асосий янгиланиш M4 процессоридир, аммо шуни таъкидлаш керакки, MacBook Air фаол совитиш тизимининг йўқлиги сабабли ўз имкониятларидан тўлиқ фойдалана олмайди. Юқори юклама остида ноутбук иш фаолиятини пасайтириши мумкин. Бироқ, М3 версияси билан таққослаганда, янги чип қувватни тахминан 20 фоизга оширишни таъминлайди.

Apple шунингдек, асосий оператив хотирани 16 Gb ҳажмга оширди, бу М3 моделидагидан икки баравар кўп. Максимал конфигурация энди 32 Gb ҳажмни қўллаб-қувватлайди, бу эса қурилмани келажакда Apple Intelligence функциясидан фойдаланишга тайёрлашни англатиши мумкин.

Бироқ, янги маҳсулот ҳақида энг ёқимлиси — бу нарх. MacBook иккита вариантда сотилади: 13 дюймли экрани 999 долларга ва 15 дюймлиси 1199 долларга, бу эса худди шу M4 чипли MacBook Pro нархининг ярмига тенг. Олдиндан буюртмалар аллақачон бошланган ва қурилма 12 мартгача биринчи харидорларга етиб боради.

#Apple #ноутбук #MacBook