Қирғизистон жанубини илгари Салим Абдувалиев назорат қилгани айтилди

Қирғизистон Миллий хавфсизлик давлат қўмитаси (МХДҚ) раиси Қамчибек Ташиевнинг айтишича, республика ҳудудининг бир қисми авваллари ўзбекистонлик криминал авторитет Салим Абдувалиев томонидан назорат қилинган. Бу ҳақда у 16 январ куни олий таълим тизими ходимлари билан учрашувда маълум қилди, деб ёзди Kloop.

Ташиевга кўра, «Салимбойвачча» номи билан танилган Абдувалиев Қирғизистон жанубини тўлиқ назорат қилган.

«Уюшган жиноий гуруҳларнинг барча етакчилари, йирик тадбиркорлар, ҳатто сиёсатчилар ва депутатлар ҳам унинг олдига борган. Кейин эса ҳамма айтганларини бажаришган», деди у.

Ташиев криминал авторитет билан боғлиқ фактларни ўтган замон феълида гапириб, ҳозир бунга барҳам берилганини таъкидлади.

МХДҚ раиси, шунингдек, маҳаллий криминал етакчи Қамчибек Қўлбоевнинг ўлдирилиши масаласини ҳам эслади. У «қонунга беписанд ўғрини» йўқ қилиш буйруғини беришга мажбур бўлганини тан олди, чунки жиноий дунё вакиллари «бутун мамлакат бўйлаб ҳокимиятни қўлга киритиб, давлат билан таққосланадиган бошқарув тизимини яратган эди».

«Уларнинг ўз президенти - «қонунга беписанд ўғри», шунингдек, вилоят, туман ва шаҳарлар бўйича назоратчилар ҳам бор эди. Улар тадбиркорлардан пул йиғишган. Мен давлат манфаати учун Қўлбоевни йўқ қилиш тўғрисида қарор қабул қилишга мажбур бўлдим. Уни йўқ қилдик, кейинроқ эса шериклари ва уюшган жиноий гуруҳнинг бошқа аъзоларини ҳам йўқ қилдик», деди Ташиев.

Ташиевнинг ғурур билан таъкидлашича, бугунги кунда Қирғизистон Марказий Осиё ва бутун постсовет ҳудудида уюшган жиноий гуруҳлар мавжуд бўлмаган ягона давлатдир.

«Коля қирғиз» лақабли Қамчибек Қўлбоев машҳур «қонунга беписанд ўғри»лардан бири эди. АҚШ разведка идоралари уни дунёдаги энг йирик наркобаронлар рўйхатига ва собиқ Совет Иттифоқининг энг нуфузли 10 нафар криминал авторитети рўйхатига киритганди. Қўлбоев 2023 йил 4 октябрда Қирғизистон хавфсизлик кучлари томонидан ўтказилган махсус операция чоғида ўлдирилди.

Салим Абдувалиев 2024 йил март ойида Ўзбекистонда ўқотар қуролларнинг ноқонуний савдоси учун 6 йиллик қамоқ жазосига ҳукм қилинган эди. 2025 йил 12 январ куни 73 ёшли Абдувалиев соғлиғига кўра қамоқдан озод этилгани маълум бўлди.