Британия Хитойга янги элчихона қуриш учун рухсат беришга тайёрлигини билдирди

ХХР 2018 йилда Лондон марказидаги қироллик зарбхонасининг собиқ биносини сотиб олиб, Мерилебондаги элчихонаси шу ерга кўчирмоқчи бўлган. Аммо Британия расмийлари бунга рухсат бермай келаётган эди.

Фото: The Guardian

Буюк Британия Хитойнинг Лондонда янги катта элчихона очиш режасини қўллаб-қувватлашга тайёр. Фақат қурилиш режасига бироз ўзгартириш талаб этилади, деб ёзмоқда Financial Times.

Қайд этилишича, Буюк Британия ТИВ ва ИИВ раҳбарлари Дэвид Лэмми ҳамда Иветт Купер режалаштириш масалалари бўйича инспекцияга қўшма мактуб йўллаб, полиция Хитойнинг Лондон тарихий қисмида элчихона қуриш борасидаги сўровига билдирган эътирозини яқинда қайтариб олганини маълум қилган. Ҳукумат аъзолари Хитойни мавжуд қурилиш режасидаги айрим элементларни ўзгартиришга ва бутун Лондон бўйлаб жойлашган бошқа еттита ваколатхонаси аккредитациясидан воз кечишга чақирган.

Янги элчихона очиш масаласи узоқ йиллардан бери Пекин ва Лондон ўртасидаги дипломатик кескинлик манбаи бўлиб келаётган эди. 2018 йилда Хитой ҳукумати Тауэр яқинида жойлашган қироллик зарбхонасининг собиқ биносини 255 миллион фунт стерлингга сотиб олганди. ХХР Мерилебондаги элчихонасини шу ерга кўчирмоқчи бўлган.

Лондон муниципалитети ўшанда Хитой вакилларига рухсат бермаган эди. Воқеа Буюк Британиянинг собиқ бош вазири Риши Сунак «Британия-Хитой муносабатларининг олтин даври» тугаганини эълон қилган бир вақтга тўғри келди. 2023 йил августда Хитой Британия ҳукуматини ўзининг дипломатик мажбуриятларини бажармаганликда айблаганди.

#Лондон #элчихона #Хитой