Туркияда антиқа финал, Шомуродов ғалабага ҳисса қўшди. Европада кун ўйинлари

7 апрел куни Европа майдонларида бир қанча ғаройиб футбол сюжетлари кузатилди. Уларнинг айримларини тарихий деб аташ ҳам мумкин. Қуйида Европа футболида рўй берган асосий воқеалар, ўйинлардаги голлар ва турнир жадвалларидаги вазият.

Туркияда сюрреалистик финал

Туркия футболи ақлдан озишда давом этмоқда. Унда президентлар гоҳ ҳакамларни калтаклайди, мухлислар футболчиларга ҳужум қилади (ва аксинча), функционерлар жамоани майдондан олиб кетади — ва буларнинг барчаси бир мавсумнинг ўзида кузатилди. Бу сафаргиси эса барчасидан ўтиб тушди — «Фенербаҳче» Туркия Суперкубок ўйинини саботаж қилди.

Бунақаси фақат Туркияда бўлиши мумкин. Мамлакат Суперкубоги учун «Галатасарой» ва «Фенербаҳче» ўртасидаги ўйин иккинчи дақиқадаёқ тўхтатилди. Икарди дарвозани ишғол этди, кейин эса рақиб футболчилари майдонни тарк эта бошлади. Натижада «Галатасарой» совринга эга чиқди.

Гап шундаки, жорий мавсумда «Фенербаҳче» Туркия футболи раҳбарияти билан курашмоқда. Бу мавзудаги энг юқори чўққи 17 март куни Суперлига ўйини доирасида «Трабзонспор» мухлислари ўйин якунида истанбулликлар жамоаси футболчиларига ҳужум қилиши бўлганди. Ўша сафар ўйинида «Фенер» ирода кўрсатиб, 3:2 ҳисобидаги ғалабага эришган ва уни майдонда нишонлаганди. Бу эса «Трабзон» фанатларига ёқмаган ва улар рақиб байрамини бузиш учун майдонга тушиб келишганди. Газонда хаос бошланган: «Фенербаҳче»нинг айрим футболчилари мухлислар билан муштлашишига тўғри келганди. Полициячилар фанатларни тўхтатишга улгурмагади.

Якунда «Трабзонспор» жазоланди — олти ўйинни томошабинларсиз ўтказадиган бўлди. «Фенербаҳче»ни эса бу унчалик қизиқтирмайди: улар олдиндан федерациядан норози бўлиб келаётганди. Истанбулликлар расмийлар уларга нисбатан тизимли адолатсизлик қилиб келмоқда деб ҳисоблайди. Бу «Фенер» ўйинларида адолатсиз ҳакамлик, клубга ёмон муносабат, келишилган учрашувларда иштирок этиш ҳақида. Сўнгги воқеа эса кардинал ҳаракатларга ундади. «Фенербаҳче» раҳбарияти Туркия Суперлигасини тарк этиб, бошқа чемпионатда ўйнаш (ла лига, А серия, Франция, Белгия ёки Нидерландия  чемпионатлари) имкониятларини кўриб чиқа бошлади. Апрел ойи бошида клуб Туркия Кубогида иштирок этмаслигини маълум қилди.

Суперкубок ўйини арафасида ОАВ «Фенербаҳче» бу ўйинни бузишни режалаштираётгани ҳақида хабар топди. «Галатасарой» билан ўйинга бизнинг жамоа U19 жамоасидаги тўққиз футболчи билан чиқади. Кейин улардан уч нафари қандайдир йўл билан дисквалификация олишади. Бу эса ўйинни тўхтатишга имкон беради», — дея «Фенербаҳче» директорлар кенгаши аъзоси Эрол Билежикнинг сўзларини келтирган Ajansspor.

Қоидаларга кўра, ўйин бошланиши учун жамоада тўққиз футболчиси бўлиши керак, агар улар олти нафар бўлиб қолса, бу жамоага техник мағлубият ёзилади.

«Канарейкалар» якунда Шонлиурфадаги ўйинга 2005 ва 2006 йилларда туғилган футболчиларини юборди. Таркибнинг қолган футболчилари, жумладан бош мураббий Исмаил Картал ҳам Истанбулда қолди.

«Фенербаҳче» чиндан ҳам ўйинни бузди: майдонга 9 эмас, 11 нафар ўсмир ва ёш футболчилар чиқиб келди, улар илк дақиқадаёқ Мауро Икардидан гол ўтказиб юборишди. Шундан кейин ёш футболчилар майдонни ташлаб кетишди.

Ўйин бош ҳаками Абдулқодир Битиген «Фенербаҳче»нинг техник мағлубиятини эълон қилди. «Галатасарой» эса Туркия Суперкубогидаги ғалабани нишонлади. Буларнинг бари сюрреалистик кўринишда эди.

Мухлислар билан 10 дақиқалик хурсандчиликдан кейин эса «Галатасарой» йиғилганларни зериктириб қўймаслик учун асосий ва захира таркиби иштирокида ўйинни давом эттиришга қарор қилди. 

«Галатасарой» — совринни қўлга киритди. «Фенербаҳче» эса маҳаллий футбол раҳбариятига қарши курашни давом эттиради.

«Челси» йўқ жойдан очко йўқотди

«Челси» – Англиянинг энг ўйинини тахмин қилиб бўлмайдиган жамоаси. Лондонликлар олдинги турда қўшимча дақиқаларда икки гол уриб «МЮ»ни мағлуб этганди (4:3), энди эса аутсайдер билан ўйинда очко йўқотди. «Шеффилд Юнайтед» билан ўйин давомида лондонликлар икки бор ҳисобда олдинга чиқиб олишди – ва икки гол ўтказиб юборишди. «Шеффилд»нинг иккинчи голи 90+3-дақиқага тўғри келди. Якунда – 2:2. Маурисио Почеттино жамоасида ҳали ҳам топ-6га кириш учун имконият бор. Аммо бундай йўқотишлар жамоани еврокубоклар йўлланмасидан узоқлаштиради.

{Yii::t(}

Ўтказиб юбориш 6s

Ўтказиб юбориш

«Тоттенҳэм» топ-4га қайтди

«Тоттенҳэм» мавсумни сирли жамоа сифатида бошлаганди. Ҳеч ким Ангелос Постекўғли бошқарувидаги «шпорлар»дан нима кутиш мумкинлигини билмасди. Аммо лондонликлар юқори прессинг ва ҳужумдаги ранг-баранглик билан қоришган ўта тажовузкор футболи орқали кўпчиликни ҳайрон қолдирди. «Тоттенҳэм» узоқ вақт етакчилар қаторида юрди, аммо кузнинг иккинчи ярмида жароҳатлар эпидемияси туфайли очко йўқотишни бошлади ва чемпионлик пойгасини тарк этди. Аммо ҳозирда клуб Чемпионлар лигасига йўлланма берувчи ўрин учун курашни давом эттирмоқда. Ва «Тоттенҳэм» кучли тўртликка қайтди.

Бир кун олдинги ўйинда «Астон Вилла» «Брентфорд» билан дуранг ўйнаб (3:3) қўйганди, «шпорлар» эса ўз уйида «Ноттингҳем»ни қийинчиликсиз мағлуб этди. Биринчи бўлимдан кейин таблода дуранг ҳисоб ёниб турганди. Аммо Микки ван де Вен ва Педро Порронинг голлари ғалабани таъминлади. «Тоттенҳэм» ва «Вилла» 60 тадан очко жамғарган, аммо тўплар нисбатига кўра лондонликлар олдинда. Қолаверса, Постекўғли жамоасида захира ўйини бор.

Шомуродовда яна голли пас

«Аталанта» 31-турга бой берилган очколар бўйича бешинчи поғонада етиб келди. Айни вақтда бу ўрин кейинги мавсумда Чемпионлар лигасида ўйнаш имконини беради (Италия – ҳозирги еврокубоклар мавсуми коэффициентлари бўйича топ-2 да). Бергамоликлар Клаудио Раниери бошқарувидаги «Каляри» меҳмони бўлди. Италиялик мутахассис ўзбекистонлик ҳужумчи Элдор Шомуродовни бошланғич таркибда туширди ва у ишончни оқлади.

«Аталанта» тезкор гол билан ҳисобни очганди, аммо бўлим охирида Шомуродов тўрт рақиб қуршовида туриб Аужеллога голли пас узатди.

Diego lives on… in Shomurodov pic.twitter.com/oWKCrahpum

— Patrick Kendrick (@patrickendrick) April 7, 2024

Бу унинг жорий мавсумдаги учинчи голли паси бўлди, бир неча ойни жароҳат туфайли ўтказиб юборган ҳужумчи март ойи бошида «Салернитана» дарвозасига икки гол урганди. Бу учрашувда эса у иккинчи бўлимда захирага олинди, «Каляри» 88-дақиқада ғалаба голини урди. Эндиликда жамоа очколари сонини 30 тага етказиб, 13-ўринга кўтарилиб олди. 50 очко билан қолган «Аталанта» эса 55 очкога эга «Рома»ни таъқиб этмоқда, аммо Гасперини жамоасида битта захира ўйини ҳам бор.

Аллегрибол амалда

«Ювентус» ўйинлари уйқусизликдан қийналадиганлар учун қўл келиши мумкин. Макс Аллегри бошқарувидаги жамоа бу сафар «Фиорентина»га қарши ўйиннинг биринчи бўлимидаёқ ухлатиб қўювчи футбол ўйнашга киришди. Туринликлар 21-дақиқада ҳисобни очди: бурчак зарбаси амалга оширилганда Федерико Гатти қайтган тўпга биринчи бўлиб етиб келди. Кейин эса Влаҳовичнинг голи кичик офсайд туфайли бекор қилинди. Кейин мезбонлар бор маҳоратини ишга солиб, ўйинни «ўлдирди». «Ювентус» ўйин вақтининг 25 фоиз қисмида тўпга эгалик қилди, «Фиорентина» эса — 75 фоиз. Иккинчи бўлимда статистика янада даҳшатли кўриниш олди: «фиалкалар» фойдасига 16 фоизга қарши — 84 фоиз. Аммо Аллегри жамоаси меҳмонларга ҳужумда имконият бермади ва ғалабали ҳисобни сақлаб қолди.

«Ювентус» А сериядаги сўнгги беш турда илк ғалабасига эришди. Энди туринликлар Чемпионлар лигаси учун курашдан чиқиши даргумон. Бешинчи ўринда келаётган «Рома» билан фақр — етти очкони ташкил этмоқда.

«Аякс» тарихидаги энг ёмон кун

«Аякс» Эредивизиядаги иштироки тарихидаги энг йирик мағлубиятни қабул қилиб олди. Бу энг ашаддий рақиблардан бири – «Фейеноорд» билан ўйинда рўй берди. Амстердамликлар олтита жавобсиз гол ўтказиб юборишди, зарбалар статистикаси эса роттердамликлар фойдасига 1:30. Қайд этиш керакки, амстердамликлар посбони Херонимо Рули тўққиз сейв амалга оширди. Агар аргентиналик дарвозабон ўзини кўрсатмаганида ҳисоб янада йирикроқ кўриниш олган бўларди.

«Фейеноорд» бу ғалабадан кейин иккинчи ўринни мустаҳкамлади ва кейинги мавсумда Чемпионлар лигасида қатнашиш учун катта қадам ташлади. Инқироз ҳолатидаги «Аякс» эса фақат Конференциялар лигасига йўлланма олиши мумкин. Ҳолбуки ушбу жамоа беш йил олдин ЕЧЛ финалига чиқишига 30 сония етмаганди.