Миришкорда кўлда чўмилаётган профилактика инспектори ғойиб бўлган. Прокуратура воқеани текширмоқда

33 яшар “участкавой” 4 кундан бери қидирилмоқда.

Сечанкўл табиий сув ҳавзаси Фото: qashqadaryogz.uz

Профилактика инспектори 31 июль куни Миришкор тумани ҳудудидаги Сечанкўл табиий сув ҳавзасида чўмилаётиб йўқолиб қолган. Kun.uz манбасининг хабар беришича, туманнинг Помуқ чўл зонасида 4 нафар профилактика инспекторлари кетаётган машина бузилиб қолган. Ҳамма уни тузатиш билан андармон бўлиб турган вақтда “участкавой”лардан бири кўлда чўмилишга қарор қилади.

Бироқ у ҳадеганда қайтавермагач, шериклари 33 яшар ходимни қидиришга тушишади. У 4 кундан бери қидирилмоқда, бироқ ҳалигача на ўзи ва на мурдаси топилди. Тумандаги “Барҳаёт” МФЙ профилактика инспектори бўлиб фаолият юритган йигит чўкиб кетган бўлиши мумкин

Kun.uz’нинг ички ишлар органларидаги манбаси ҳолат юзасидан прокуратура органи томонидан текширув ўтказилаётганини билдирди.

30 июл куни Каттақўрғон сув омборида қайиқ ағдарилиб кетиши оқибатида 21, 25, 22 ва 21 ёшдаги чироқчилик 4 йигит чўкиб кетгани, улар билан бир қайиқда бўлган 3 нафар йигит эса қирғоққа сузиб чиқа олгани ҳақида хабар берилганди.

#бахтсиз ҳодиса #Миришкор #ИИБ