Xitoyda talabalarga pichoq bilan hujum qilgan shaxs qatl etildi

Imtihondan o‘tolmagan talaba universitet kampusida 8 kishini o‘ldirgan edi.

Foto: AP

Xitoy hukumati Tszyansu provinsiyasidagi san’at o‘quv dargohiga pichoq bilan hujum qilgan erkakni qatl qildi, deya xabar berdi «Sinxua».

O‘tgan yilning 16 noyabr kuni Syu Tszyatszin Usi San’at va texnologiya kasb-hunar institutida talabalar va o‘qituvchilarga hujum qilgan, oqibatda 8 kishi halok bo‘lgan, yana 17 kishi jarohatlangan edi. U imtihondan o‘tolmagani uchun qotillikka qo‘l urgani ta’kidlandi. Dekabr oyida hujumchi sud tomonidan o‘limga hukm qilindi.

Avvalroq, 20 yanvar kuni ommaviy qotillikda aybdor deb topilgan yana bir Xitoy fuqarosi qatl etildi. Guandun provinsiyasining Chjuxay shahri sudi 62 yoshli Fan Veytsyuga nisbatan o‘lim jazosini ijro etdi. 2024 yil noyabr oyida u mashinasini olomon ustiga haydab, 35 kishini o‘ldirgan va 43 kishini jarohatlagan edi.

#o‘lim jazosi #Xitoy #ommaviy qirg‘in