UzAuto Motors kompaniyasining shvetsiyalik sobiq rahbari yangi ish topdi

Bo Andersson Yaponiya avtomobil sanoati sohasi kompaniyasida maslahatchi sifatida ishlaydigan bo‘ldi.

Foto: TASS

UzAuto Motors kompaniyasining shvetsiyalik sobiq rahbari Bo Inge Andersson Yaponiyaning Sanoh Industrial kompaniyasiga ishga joylashdi. Bu haqda top-menejer LinkedIn ijtimoiy tarmog‘ida yozdi.

Sanoh kompaniyasi avtomobilsozlik sanoati uchun tormoz quvurlari, tutun chiqarish tizimi va konditsioner komponentlari, akkumulyatorlar kabi mahsulotlar ishlab chiqaradi. Andersson yaponiyaliklar uchun maslahatchi sifatida ishlaydi.

Bo Andersson 2024 yil dekabrida UzAuto Motors kompaniyasiga rahbarlik lavozimini tark etgan edi. Andersson faoliyatining birinchi to‘liq yili bo‘lgan 2022 yilda zavod 327,6 ming avtomobilni konveyerdan chiqarib, rekord o‘rnatdi. Keyingi 2023 yil ham ishlab chiqarish bo‘yicha rekordli bo‘ldi — 395,4 mingta avtomobil.

Bo Andersson 2013 yildan 2016 yilgacha Rossiyaning «AvtoVAZ» konserni rahbari bo‘lgan.

#UzAuto Motors #Bo Andersson #Sanoh Industrial