Олимлар сунъий интеллектни имо-ишораларни танишга ўргатди

Хитойлик олимлар имо-ишораларни юқори аниқликда тушунишга қодир янги усулни ишлаб чиқди. Бу протезларни бошқаришда қўл келиши мумкин.

Фото: ТАСС

Шанхайда жойлашган Цзяо Тун университети олимлари имо-ишораларни танишнинг инновацион усулини ишлаб чиқди. Уларнинг усули мушак сигналларининг тўпланган импулсларидан ҳосил бўлган тасвирларга асосланади.

Мазкур усул юқори зичликдаги сирт электромиографияси (HD-sEMG) сигналларини таҳлил қилишга асосланган — технология мушакларнинг электр фаоллигини юқори аниқликда қайд этади. Тадқиқотчилар сигналларни мушак фаоллигини акс эттирувчи импульсли кетма-кетликларга (cw-CST) ажратиб, ушбу маълумотларни қўлдаги электродларга мос жойлашган икки ўлчамли тасвирларга айлантирган.

Шундан сўнг, ушбу тасвирлар махсус ишлаб чиқилган нейротармоқ орқали таҳлил қилинган — у ишораларни таснифлаш учун керакли белгиларни ажратиб олади. Тажрибалар давомида модел 10 хил ишорани юқори аниқлик билан муваффақиятли аниқлаган ва асосий кўрсаткичлар бўйича мавжуд усуллардан устунликка эришган.

«Анъанавий, қўпол белгилар асосидаги ёндашувлардан фарқли равишда, бизнинг моделимиз мушак фаоллигининг фазовий хусусиятларини ҳисобга олади ва нерв тизими орқали ҳаракатларни бошқаришни янада аниқроқ акс эттиради», — дея таъкидлайди тадқиқот раҳбари Ян Юй.

Муаллифларнинг қайд этишича, ушбу технологиядан кўплаб соҳаларда фойдаланиш мумкин: протезларни бошқариш, жароҳатлардан кейинги реабилитациядан тортиб, кенгайтирилган реаллик интерфейсларига қадар.

«Бизнинг усул мия ва мушаклардаги ўзаро таъсирни аниқроқ ифодалайди ва янги авлод қурилмаларининг асосини ташкил этиши мумкин», — деб қўшимча қилади Ян Юй.

#сунъий интеллект