Тошкентда рақамсиз Spark ҳайдовчиси ЙПХ ходимларидан қочди

Тошкент шаҳар ИИББ ЙҲХБ матбуот хизмати ЙПХ ходими ҳайдовчига қўл кўтаргани ҳақида тарқалган хабарлар юзасидан муносабат билдирди.

Фото: Видеодан кадр

Ижтимоий тармоқларда ЙПХ ходимлари ёш йигитни куч билан хизмат машинасига ўтирғизаётгани акс этган видео тарқалди, кадрларда ходимлардан бири фуқаронинг бошига ургани кўринган.

Давлат Йўл ҳаракати хавфсизлиги хизмати матбуот котиби мазкур ҳолат ижтимоий тармоқларда нотўғри талқин қилинаётганини билдирди. Маълум бўлишича, ҳолат 11 апрел куни соат 23:50 ларда Тошкент шаҳрида рўй берган.

Ўша куни ЙПХ ходимлари давлат рақам белгисисиз, ноқонуний равишда «мигалка» ўрнатиб, уларни ёқиб олган Spark автомашинасига тўхташ ишорасини берган.

Ҳайдовчи ходимларнинг кўрсатмасига амал қилмасдан, ҳаракатини давом эттирган. У бир неча бор светофорнинг қизил чироғига бўйсунмай ҳаракатланиб, ўзининг ва бошқаларнинг ҳаётини хавф остига қўйган.

Йўл ҳаракати хавфсизлиги хизмати эълон қилган видеода эса ЙПХ ходимлари томонидан тўхтатилган ҳайдовчи огоҳлантиришга қарамай, транспорт воситасидан тушмагани, натижада унинг бошқарувидаги Spark автомашинасининг олд ойнаси инспекторлар томонидан синдирилганини кўриш мумкин.

Ҳозирда ҳайдовчининг жавобгарлик масаласи кўриб чиқилмоқда. Шунингдек, ЙПХ ходимларига нисбатан хизмат текшируви тайинланган.

Автомашина эса жарима майдончасига жойлаштирилган.

Бундан аввалроқ Тошкент шаҳрида 5 апрел куни юқори тезликда ҳаракатланган Malibu ҳайдовчиси ЙПХ ходимини “капот” устида судраб кетгани хабар қилинганди.

#ЙПХ