АҚШ Трамп буйруғидан кейин Ямандаги ҳусийчиларга авиазарбалар бермоқда

АҚШ Ямандаги исёнчи ҳусийчиларга «қатъий ва кучли» ҳаво зарбалари тўлқинини бошлади, деди президент Доналд Трамп ва ўз қарорини қуролли гуруҳнинг Қизил денгиздаги кемаларга ҳужумлари билан изоҳлади – бу дунёдаги энг муҳим нефт ва ёқилғи ташиш йўналишларидан бири.

«Бугун мен Америка Қўшма Штатлари ҳарбийларига Ямандаги ҳусий террорчиларга қарши қатъий ва кучли ҳарбий чора кўришни буюрдим. Улар Америка ва бошқа давлатларнинг кемалари, самолётлари ва дронларига қарши қароқчилик, зўравонлик ва терроризмнинг тинимсиз кампаниясини олиб бормоқда», деб ёзди у Truth Social саҳифасида.

«Террорчи ҳусийчиларга хабар бераман: сизнинг вақтингиз тугади. Сиз бугуноқ ҳужумларни тўхтатишингиз керак. Акс ҳолда, сизни ҳали ҳеч қачон бошдан кечирмаган дўзах азоби кутмоқда», деб қўшимча қилган АҚШ президенти.

«Бизнинг жасур ҳарбийларимиз ҳозирда Америка денгиз, ҳаво ва ҳарбий-денгиз активларини ҳимоя қилиш ва кемалар қатнови эркинлигини тиклаш учун террорчилар базалари, уларнинг етакчилари ва ракетага қарши мудофаасига ҳаводан зарбалар бермоқда», деб ёзган Трамп.

Ҳусийчилар ўз баёнотида АҚШ ва Буюк Британияни Сано аҳолисига қарши «ёвуз» тажовузда айблади. Бироқ Лондоннинг Яманга шанба кунги зарбаларга алоқаси йўқлиги маълум.

The New York Times газетасининг икки юқори мартабали америкалик мулозимга таяниб хабар беришича, Қўшма Штатлар Яман ҳусийчилари назоратидаги ўнлаб объектларга кенг кўламли ҳарбий зарбалар беришни бошлаган.

Ҳусийчилар назорати остидаги Соғлиқни сақлаш вазирлиги зарбалар оқибатида камида 15 киши ҳалок бўлгани ва тўққиз киши яраланганини маълум қилди.

Ҳусийчилар – яманлик шиа жангари ҳаракати бўлиб, расман «Ансоруллоҳ» номи билан танилган. Улар Яман ҳукуматига қарши, шунингдек, Саудия Арабистони ва унинг иттифоқчиларига фаол қуролли қаршилик кўрсатади, Исроилни асосий душмани деб ҳисоблайди.

Ҳаракат 1990-йилларда Ҳусайн Ал-Ҳусий таъсирида пайдо бўлган ва унинг номи билан аталган. Ҳусийчилар 2014 йилдан бери мамлакат пойтахти Санони ҳамда мамлакат шимоли-ғарбини назорат қилади, аммо халқаро даражада тан олинмаган. Улар Эрон томонидан қўллаб-қувватланади ва бу уларни Эрон ва Саудия Арабистони ўртасидаги кенгроқ минтақавий қарама-қаршиликнинг бир қисмига айлантиради.

Трамп Эронни ҳусийчиларни қўллаб-қувватлашни тўхтатишга чақириб, Вашингтон Теҳронни «тўлиқ жавобгарликка тортиши» ҳақида огоҳлантирди.

«Америка халқига, президентлик тарихидаги энг йирик мандатлардан бирини олган унинг президентига ёки дунё кемачилик йўлларига таҳдид қилишга журъат этманг. Агар шундай қилсангиз, эҳтиёт бўлинг, чунки Америка бунинг учун сизни тўлиқ жавобгарликка тортади, биз сизга кўнгилчанлик қилмаймиз», – дея огоҳлантирди Трамп.

Ғазо секторида уруш бошланганидан сўнг, ҳусийчилар Ҳамас билан бирдамлигини эълон қилди.

Улар кенглиги тахминан 30 км бўлган тор Боб ал-Мандиб бўғозидан ўтувчи кемаларни ракета ва дронлар билан ўққа тута бошлади.

АҚШ Конгресси маълумотларига кўра, 2023 йил ноябридан 2024 йил октябригача ҳусийчилар Қизил денгизда 190 та ҳужум уюштирган.

Ҳусийчилар Исроилга кетаётган кемаларни ўққа тутаётганини даъво қилади, аммо ўққа тутилган кемаларнинг ҳаммаси ҳам у ерга бормаган.

Вақт ўтиши билан ҳусийчилар бўғоз бўйлаб ҳаракатланган кемаларни тобора фаолроқ ўққа тута бошлади, шунингдек, Исроил томон ракеталар ва дронлар учирди.

Ҳусийчиларнинг ҳужумлари туфайли деярли барча кемачилик компаниялари Қизил денгиз орқали парвозларни тўхтатиб, ўз кемаларини узоқроқ масофадан айланиб ўтишга йўналтирди.

Қизил денгиз нефт, суюлтирилган газ ва бошқа товарларни ташиш бўйича дунёдаги энг муҳим йўналишлардан бири ҳисобланади.

Гуруҳ араб оммавий ахборот воситаларига ҳужумларни давом эттиришини ва ҳаво ҳужумлари уларнинг фаластинликларни қўллаб-қувватлашини сусайтирмаслигини айтди. «Бу тажовуз жавобсиз қолмайди ва Яман қуролли кучлари эскалацияга янада кескинлик билан жавоб беришга тайёр», – деди гуруҳ вакиллари.