Зеленский Трамп билан янги музокаралар ўтказишни хоҳлаётганини айтди

Володимир Зеленский Доналд Трамп билан музокара столига қайтишга ва Украинада ўт очишни тўхтатиш бўйича ўз режасини илгари суришга тайёрлигини айтди. Украина раҳбари бу сўзларни 4 март, сешанба куни Х ижтимоий тармоғида ёзди.

Зеленский: Трамп раҳбарлигида ишлашга тайёрман

«Украина барқарор тинчликни яқинлаштириш учун имкон қадар тезроқ музокаралар столига ўтиришга тайёр. Тинчликни украиналиклардан кўра кўпроқ ҳеч ким хоҳламайди. Мен ва менинг жамоам президент Трампнинг кучли раҳбарлиги остида мустаҳкам тинчликка эришиш учун ишлашга тайёрмиз», деб ёзган Зеленский.

«Биз урушни тугатиш учун тезда ишлашга тайёрмиз ва кейинги сўнгги босқичларга ракеталар, узоқ масофали дронларга тақиқ, маҳбусларни озод қилиш айланиши мумкин», деди Украина президенти.

У Украинага кўрсатган ёрдами учун АҚШ ва шахсан Трампга яна бир бор миннатдорчилик билдирди ва 28 феврал куни Оқ уйда бўлиб ўтган музокаралар «кутилганидек ўтмаганини» тан олди. «Афсуски, шундай бўлди. Ҳамма нарсани тузатиш вақти келди. Биз келажакдаги ҳамкорлик ва мулоқот конструктив бўлишини истардик», деб ёзади Зеленский.

«Ер ости бойликлари ва хавфсизлик бўйича келишувга келсак, Украина уни исталган вақтда ва исталган қулай форматда имзолашга тайёр. Биз бу келишувни хавфсизликни ошириш ва ишончли хавфсизлик кафолатлари сари қадам деб биламиз ва унинг самарали ишлашига чин дилдан умид қиламан», — дея хулоса қилди сиёсатчи.