АҚШ Россиянинг янги элчиси номзодига розилик берди

Россия Ташқи ишлар вазирлиги хабарига кўра, Александр Дарчиевнинг АҚШдаги элчи этиб тайинланишига агреман олинган.

Фото: picture-alliance/AP Photo/J.S. Applewhite

Истанбулдаги маслаҳатлашувлар чоғида Қўшма Штатлар Россия Ташқи ишлар вазирлигининг Шимолий Атлантика департаменти директори Александр Дарчиевнинг Россиянинг АҚШдаги янги элчиси этиб тайинланиши ҳақидаги келишув билан расмий нота тақдим этди. «Унинг Вашингтондаги хизмат пунктига жўнаб кетиши яқин орада кутилмоқда», — дейилади Россия ТИВ 28 феврал, жума куни эълон қилган баёнотда.

Дарчиев Ломоносов номидаги Москва давлат университетининг тарих факултетини тамомлаган. 1983-1992 йилларда АҚШ ва Канада институтида аспирант ва илмий ходим бўлган. 1992 йилдан буён дипломатик хизматда. 1997-2002 йилларда Дарчиев Россиянинг АҚШдаги элчихонасида маслаҳатчи, 2005-2010 йилларда эса маслаҳатчи-вакил лавозимларида ишлаган. 2014 йилдан 2021 йилгача у Россиянинг Канададаги элчихонасини бошқарган.

2024 йилнинг кузида Россия матбуоти Дарчиевнинг АҚШдаги элчи лавозимига тайинланиши мумкинлиги ҳақида ёзган эди. Аввалги элчи Анатолий Антонов 10 октябрда президент фармони билан ўз вазифасидан озод этилган эди, у дипломатик миссияни етти йил бошқарган.

Дарчиев Истанбулдаги Россия ва АҚШ музокараларида иштирок этди

27 феврал куни Дарчиев Истанбулдаги Россия-Америка музокараларида иштирок этди. Учрашувда Россия Федерацияси ва АҚШ делегациялари дипломатик ваколатхоналарни молиялаштириш, дипломатларнинг ишлаши учун шарт-шароитлар, 2016-2018 йилларда АҚШда олиб қўйилган олтита кўчмас мулкни Россияга қайтариш, шунингдек, тўғридан тўғри ҳаво қатновини тиклаш имкониятларини муҳокама қилди, дея хабар берди Россия ТИВ. АҚШ Давлат департаменти, шунингдек, томонлар дипломатик миссиялар фаолиятини барқарорлаштириш бўйича дастлабки қадамларни белгилаб олгани ҳақида хабар тарқатди.

#АҚШ #Россия