АҚШдан депортация қилинган 7 нафар ўзбекистонлик Тошкентга олиб келинди

АҚШдан Коста-Рикага депортация қилиниши режалаштирилган ўзбекистонликларнинг бир қисми Тошкентга етиб келди, деб хабар беради ТИВ матбуот котиби.

«АҚШ томони билан олиб борилган музокаралар натижасида Коста-Рикага юборилиши режалаштирилган, лекин ватанга қайтиш ниятида бўлган 7 нафар фуқаромиз 24 феврал куни Ню-Йорк—Тошкент йўналиши бўйича Ўзбекистонга етиб келди», — деб ёзади Аҳрор Бурхонов.

Бошқа тафсилотлар келтирилмаган.

Маълумот учун, АҚШда Доналд Трамп бошчилигидаги республикачилар ҳокимиятга келгач, миграция сиёсати қатъийлаштирилди. Феврал ойи бошида АҚШ ҳукумати осиёлик муҳожирларни давлатдан тезроқ чиқариб юбориш учун Панамага депорт қилишни бошлади. Биринчи гуруҳда ўзбекистонликлар ҳам борлиги айтилган.

20 феврал куни эса АҚШ чегарасини ноқонуний кесиб ўтган 200 нафар мигрант (Ўзбекистон, Қозоғистон, Қирғизистон, Покистон ва Ҳиндистон фуқаролари) Коста Рикага жўнатилиши хабар қилинганди. Улар Коста-Рикада олти ҳафтагача ушлаб турилиши ва шундан кейин ватанига жўнатилиши мумкинлиги айтилганди.

Шундан сўнг Ўзбекистон томони ўз фуқароларини Қўшма Штатлардан хавфсиз депортация қилиш масалалари бўйича АҚШ ва Лотин Америкаси давлатлари расмийлари билан алоқада бўлиб тургани ҳақида хабар берилганди. «Бизнинг келишувларимизга асосан, Америка томони депортация қилинадиган фуқароларимизнинг ҳар бир ҳолати ҳақида тезкорлик билан хабардор қилади. Ўрнатилган амалиётга кўра, фуқароларимиз ватанга Ню Йорк–Тошкент йўналиши орқали қайтади», — деганди ТИВ вакили.