Уолтц: АҚШ Украина хавфсизлиги кафолатларини Европага юклайди

Украина учун хавфсизлик кафолатлари масаласи Европага ишониб топширилади, Қўшма Штатлар эса Киевга ҳарбий ёрдам учун харажатларини қоплаши керак, деди Трампнинг миллий хавфсизлик бўйича маслаҳатчиси.

Майк Уолтц Фото: Elizabeth Frantz / Reuters

АҚШ президенти Доналд Трамп маъмуриятининг юқори мартабали расмийлари келаси ҳафта европалик амалдорлар билан учрашиб, Украинадаги кенг кўламли урушни тугатиш йўлларини муҳокама қилади. Бу ҳақда 9 феврал, якшанба куни АҚШ президентининг миллий хавфсизлик бўйича маслаҳатчиси Майк Уолтцга таяниб, Associated Press хабар берди. Уолтцга кўра, АҚШ давлат котиби Марко Рубио, мудофаа вазири Пит Хегсет, вице-президент Жей Ди Вэнс ҳамда АҚШнинг Украина ва Россия бўйича махсус вакили Кит Келлог Европага сафар қилади.

Шу куни Майк Уолтц NBC телеканалига берган интервюсида айнан Европа Украинага уруш тугаганидан кейин хавфсизлик кафолатларини бериши кераклигини, АҚШ эса Киевга ҳарбий ёрдам учун сарфлаган харажатларини қоплаш ниятида эканини айтди. «Биз бу харажатларни қоплашимиз керак ва бу украиналиклар билан нодир металлар, табиий ресурслар, нефт-газ ва бизнинг ресурсларимизни сотиб олиш бўйича ҳамкорлик бўлади», деди Трамп маслаҳатчиси.

АҚШ президенти «урушни тугатиш» ва «барча томонларни», жумладан Хитой, Ҳиндистон ва Яқин Шарқни музокараларга жалб этиш ниятида, дея таъкидлади Уолтц. Шунингдек, у, агар Москва мулоқотдан бош тортса, Трамп Россияга қарши «солиқлар, тарифлар, санкциялар» жорий этишдан қўрқмаслигини қўшимча қилди.

АҚШ Украинага ҳарбий ёрдамни вақтинча тўхтатган

АҚШнинг янги маъмурияти бир неча кунга Украинага ҳарбий ёрдам етказиб беришни тўхтатиб қўйди ва кейин қайта тиклади. Бу ҳақда Reuters агентлигига тўрт хабардор манба маълум қилди, дея хабар беради агентлик 3 феврал куни.

Етказиб бериш қачон тўхтатилгани ҳақида аниқ маълумот бермаган Reuters бу Доналд Трамп маъмурияти ичидаги келишмовчиликлар туфайли содир бўлганини ёзади. У 20 январ куни лавозимга киришган. Агентлик маълумотларига кўра, етказиб бериш «сўнгги кунларда» тўхтатилган ва «дам олиш кунлари», яъни 1-2 феврал кунлари қайта тикланган.

Оқ уй аввалига Украинага барча ёрдамни тўхтатмоқчи бўлган, бироқ кейин унинг позицияси ўзгарган, дея таъкидлайди Reuters. «Маъмурият ичида Қўшма Штатлар Киевга ўз захирасидаги қурол-яроғлар билан қай даражада ёрдам беришни давом эттириши кераклиги борасида келиша олмаётган гуруҳлар бор», деб ёзади агентлик ва «бу қисқа пауза Трамп маъмурияти ичидаги мунозаралар шиддатининг биринчи аниқ белгисидир», дея хулоса қилди.

Оқ уй маълумотга изоҳ беришдан бош тортди.

#АҚШ #Майк Уолтц