Хитойда аккумуляторларни утилизация қилишнинг инқилобий усули ўйлаб топилди

Хитой Фан ва технологиялар университетининг бир гуруҳ олимлари литий аккумуляторларни қайта ишлашнинг экологик технологиясини тақдим этди. Тадқиқот натижалари Nature Sustainability журналида эълон қилинган.

Қайд этилишича, профессор Чэн Вэй бошчилигидаги тадқиқотчилар гуруҳи литий ионларининг азот икки оксиди билан ўзаро таъсирига асосланган электрокимёвий жараённи ишлаб чиққан. Ушбу технологиянинг ўзига хослиги фақат металл ишқорини ўтказадиган керамик мембранадан фойдаланилишида — у қайта ишлашнинг юқори самарадорлигини таъминлайди.

Тест натижалари ишлатиб бўлинган аккумуляторлардан 97 фоизгача литийни ажратиб олиш, шунингдек, қайта ишланган ҳар бир килограмм материалдан 66 ватт электр энергиясини генерация қилиш мумкинлигини кўрсатган. Олимларнинг таъкидлашича, ушбу жараён қиммат кимёвий моддалардан фойдаланишни талаб этмайди ва атроф-муҳитга зарарли таъсирни камайтиради.

Саноат чиқиндиларидан азот диоксидини ажратиб олиш учун олимлар диметилформамид асосидаги электролитлар билан тежамкор углерод мембраналаридан фойдаланган. Литий ионлари билан реакцияга киришилганида тоза литий нитрат пайдо бўлади ва бир вақтнинг ўзида электр энергияси генерацияси амалга ошади.

Тадқиқотчиларнинг фикрича, мазкур инновация литий аккумуляторларни қайта ишлаш йўналишини бутунлай ўзгартириб юбориши мумкин. Янги технология ҳар йили чиқиндига ташланадиган ўн минглаб тонна батареяларни утилизация қилишда нисбатан экологик ва иқтисодий жиҳатидан фойдали ечимни тақдим этади.