Онлайн тўлов тизимлари бозорида Payme устун мавқега эга деб топилди

Рақобат қўмитасининг буйруғи билан, "Payme" АЖ устун мавқега эга рақамли платформа оператори деб эътироф этилди.

Фото: Payme

Компания томонидан онлайн тўлов тизимлари бозорида устун мавқега эришгани тўғрисида тақдим этилган хабарномаси бунга асос бўлди, маълум қилди Рақобат қўмитаси.

Ўзбекистонда рақамли платформа операторининг устун мавқейини ва устун музокара кучини эътироф этиш тартиби ўтган йили тасдиқланган.

Унга кўра, қуйидаги шартларнинг бирига риоя қилинганда ҳамда бевосита ва билвосита тармоқ самараси мавжуд бўлганда рақамли платформа оператори устун мавқега эга деб эътироф этилади:

— сўнгги календар йилдаги тушуми БҲМнинг 100 минг баравари (37,5 млрд сўм)га тенг ёки ундан юқори бўлса;
— фаол якуний фойдаланувчиларининг умумий ўртача сони ҳар ойда камида 50 мингни ёки фаол тадбиркор фойдаланувчиларнинг ўртача сони ҳар ойда камида 3 мингни ташкил этса.

Устун мавқега эга деб топилган субъектларга нисбатан устун мавқейини суиистеъмол қилиш деб малакаланадиган 20 га яқин тақиқлар жорий этилади.

Payme тўлов тизими Грузиянинг TBC гуруҳи таркибига киради. 2024 йилнинг 9 ойида компания тушумлари 341,6 млрд сўм (2023 йилнинг мос даврига нисбатан 38,1 фоизга кўп), соф фойдаси 186,94 млрд сўм (ўсиш 22 фоиз)ни ташкил этган.
Рақобат қўмитаси аввалроқ YandexGo, Yandex Eats ва Express 24 сервислари ҳам бозорда устун мавқега эга деб топганди.

#Payme #Рақобат қўмитаси