«Дикий арман» 20 йилга озодликдан маҳрум қилинди

Қозоғистонлик криминал авторитет, Ёввойи Арман лақаби билан танилган Арман Жумагелдиев Олмаота судининг ҳукми билан 20 йилга озодликдан маҳрум қилинди. У январ воқеалари ташкилотчилигида ҳамда жиноий гуруҳ ташкил этишда айбланмоқда. Унга ҳомийлик қилган Қозоғистон МХҚ собиқ ходими эса 15,5 йилга қамалди.

Фото: Ижтимоий тармоқлар

27 январ куни Олмаота судида «Ёввойи Арман» (Дикий арман) номи билан танилган Арман Жумагелдиeв ва Олмаотадаги маҳаллий кенгаш депутати Қайрат Кудайбергеннинг иши бўйича суд жараёни якунланди. Улар 2022 йил январида Қозоғистондаги намойишлар вақтида оммавий тартибсизликларни уюштирганлик ва унда иштирок этганликда айбланмоқда.

Суд хужжатларига таяниб, маҳаллий ОАВ тарқатган хабарга кўра, Миллий хавфсизлик қўмитаси ходими Руслан Искақов кўп йиллар давомида Арман Жумагелдиeвнинг уюшган жиноий гуруҳини ҳимоя қилиб келган. Ҳатто у билан рақобатлашадиган гуруҳларни йўқ қилган. Собиқ МХҚ ходими Арман Жумангелдиевнинг «психологик жиҳатдан барқарор қўрқмас спортчилар»дан уюшган жиноий гуруҳ тузишга кўндирган.

Жумангелдиев 2017 йилдан бошлаб Туркиядан туриб гуруҳни бошқариб келган ҳамда январ воқеаларидан 1 ой олдин, 2021 йил декабр ойида Қозоғистонга қайтиб келган.

Судда айтилишича, 7 январга келиб тартибсизликлар уюштириш режаси барбод бўлганини билгач, Арманнинг гуруҳи симуляцияга ўтади. Яъни оммавий тартибсизликларда қатнашган аҳолини қўлга олиб, «жазолаган». Бу топшириқларни унга Миллий хавфсизлик қўмитаси раисининг собиқ ўринбосари Руслан Искақов бериб келган.

Олмаота суди 2022 йил январь воқеалари бўйича «Ёввойи Арман» номи билан танилган Арман Жумагелдиевга нисбатан 20 йилга озодликдан маҳрум қилиш бўйича ҳукм чиқарди. Хусусан:

Арман Жумагелдиев — Қозоғистон Миллий хавфсизлик қўмитаси кўмагида жиноий таъсирни кенгайтириш мақсадида уюшган жиноий гуруҳ ташкил этиш, 2022 йил январь воқеаларининг асосий ташкилотчиси, жиноий гуруҳ таркибида одамларни ўғирлаб, калтаклаш каби бир қанча ҳаракатларда айбдор, деб топилиб 20 йилга озодликдан маҳрум қилинди.
Қозоғистон Миллий хавфсизлик қўмитаси собиқ ходими Руслан Искақов — 2016 йилдан Жумагелдиевга «ҳомийлик» қилган, январь воқеаларида жиноят изларини яшириш учун одамларни ўғирлашни буюрганликда айбланиб, 15 йил 6 ойга озодликдан маҳрум қилинди.
Собиқ маҳаллий депутат Қайрат Худойберген – меҳмонхонада штаб ташкил этгани, бизнесни ҳимоя қилиш баҳонасида спортчиларни тартибсизликларга жалб қилишда айбдор, деб топилди ҳамда — 8 йилга озодликдан маҳрум қилинди.
Шунингдек, Ёввойи арман гуруҳининг 13 аъзоси 10 йилдан 15,5 йилгача қамоқ жазосига ҳукм қилинди. Тартибсизликларнинг қолган иштирокчилари 1,5 йилдан 7 йилгача бўлган муддатга озодликдан маҳрум қилинган.

27 январь куни бўлиб ўтган суд жараёнига жамоатчилик ва матбуотга кириш имкони берилмаган ҳамда ёпиқ эшиклар ортида ўтказилди. ОАВ вакилларига суд залини онлайн кузатишга рухсат берилди.

«Ёввойи Арман» ва унга алоқадор шахслар 2024 йилнинг февраль ойида Олмаота ва Чимкент шаҳарларида қўлга олинган эди. Қозоғистон ҳукумати Жумагелдиевни январь ойидаги намойишлар етакчиларидан бири деб атаган.

«Ёввойи Арман». Боксчининг қозоқ мафияси етакчисига айланиши тарихи

#Қозоғистон #криминал авторитет #Арман Жумагелдиев