Қўли кесилган 2 ойлик чақалоқ: унинг яқинлари шифокорлардан норози

Онаси ва бувиси иситма билан касалхонага олиб келинган чақалоққа дастлабки муолажалар таъсир қилмаганини айтмоқда. Қизалоқнинг аҳволи оғирлашавергач, у реанимацияга олинган. “Ҳамширалар укол қилаётганда томирга тўғри туша олмай, қизимнинг қўлини ҳар жойидан 4-5 мартадан тешиб ташлашди”, — дейди қизалоқнинг онаси.

Тошкент шаҳар 1-сон болалар клиник шифохонасида икки ойлик чақалоқнинг чап қўл панжаси билагигача кесиб ташланди. Операцияга қизалоқнинг қўл томирида қон қотиши ортидан гангрена юзага келгани сабаб бўлгани айтилмоқда. 

Гўдакнинг онаси Диёра Маҳкамова маълум қилишича, фарзанди Ҳадича Жавдатовани 2024 йил 9 декабр куни иситмалагани сабаб касалхонага олиб келган. Шифокор қабулига тонгги соат 06:00 лар атрофида кирган. Чақалоқ навбатчи шифокор – Г.У. томонидан тиббий кўрикдан ўтказилган. 

Беморга томоқ шиши ташхиси қўйилган. Шифокор ёш онага хоналарнинг барчаси бандлиги, фақат йўлакда жой борлиги, коридорда ётиб даволаниш мумкинлигини айтган. Бўш жой йўқлигидан она дорилар рўйхатини олиб боласи билан уйига қайтган. 3-4 соат давомида қизалоқда иситма тушмаган. Ўша куннинг ўзида ота-она фарзандини хусусий клиникалардан бирига олиб борган. 

“У ердагилар “икки ойлик чақалоққа қарамаймиз, жавобгарликни бўйнимизга ола олмаймиз” деб бизни қайтариб юборди. Кейин яна шу касалхона (1-сон болалар клиник шифохонаси)га келдик. Соат 16:00 лар атрофида Н.С. исмли бошқа врач бизни қабул қилди. Куннинг иккинчи ярмида палаталардан бирига жойлашдик. Ëтишга жойлар бор, 2-3 та хона бўм-бўш эди”, – дейди она.

Диёра Маҳкамованинг маълум қилишича, у фарзанди билан соат 12:00 дан ошганда шифохонага қайтиб келган. Навбат кўплиги сабаб иситмалаётган бола соат 16:00 гача қабул бўлимида қолиб кетган. Бу орада қизалоқнинг ҳолати янада оғирлашган. Тахминан 16:30 ларда она-бола палатага жойлаштирилган. Онанинг таъкидлашича, бемордан анамнез йиғилмаган, касаллик тарихи ҳам ўрганилмай, муолажалар бошлаб юборилган.

“Бу менинг учинчи фарзандим. Ҳужжатга эса биринчи фарзанд деб ёзиб қўйишган. Шу даражада эътиборсизлик бўлдики, ҳатто биздан анамнез ҳам олинмади. Борганимиздан боламга антибиотиклар қилинди. Номлари аниқ эсимда йўқ, лекин дориларнинг тури уч мартагача алмаштирилди. Ҳамширалар укол қилаётганда томирга тўғри туша олмай, қизимнинг қўлини ҳар жойидан 4-5 мартадан тешиб ташлашди, расмларда ҳам буни кўрсангиз бўлади”, – дея хўрсинади она. 

Муолажа вақтида чақалоқнинг қўлидан осма укол венага юборилганда унинг бармоқлари қотиб, музлаб қолган. Бу ҳақида она шикорларга маълум қилган. Масъуллар бундай ҳолат янги туғилган болаларда “капелница” олиш пайтида тез-тез такрорланиб туриши, бироздан сўнг ўтиб кетишини таъкидланган. Бу гаплардан кейин онанинг кўнгли хотиржамлашиб, 2-3 кун ўтишини кутган, бироқ чақалоқнинг қўли яхшиланиш ўрнига аҳвол ёмонлаша бошлаган. Йўтал ва иситма ҳам кучайган. Дорилар ва муолажалар яхши таъсир қилмаган. 

Касалхонага ётқизилганидан етти кун ўтиб, 16 декабр санасида, онанинг ўзи боласини реанимацияга олиб тушган. Чақалоқнинг аҳволи оғир бўлгани сабаб, уни шу бўлимда олиб қолишган. Эртасига даволовчи шифокор — Н.C. болани ўз назоратига олган.

Ҳадичанинг бувиси Нодира Алиеванинг айтишича, реанимацияда осма укол қилинаётганда чақалоқ қўл томирига катетер қисиб маҳкамланган. Шу сабаб томирнинг тепа ва паст қисмида 18 декабр санасидан кўкаришлар пайдо бўлган. Қизалоқнинг қони қуюқ бўлиши қарамай, унга кунига 5-6 марта ангиокатетер қўйилган. Катетер даставвал қўл томирига, кўкаришлар юзага келганидан сўнг бўйин соҳасига кўчирилган. Қўлдаги кўкаришлар кейинчалик қорайиб кетган. Чап қўлнинг тепасидан билак қисмигача тўқроқ кўкариш, билакдан бармоқнинг учигача тўлиқ қорайиш юзага келган. Шифокорларга бармоқчаларга “Вишневский” мазидан суртишни тавсия қилган.

3-4 кун ўтиб ҳам қўлдаги кўкаришлар кетмаган, кейин даволовчи шифокор гематологни чақирган. Гематолог томирга қуюқ қон тиқилгани, кўлида тромб ҳосил бўлганини маълум қилган. Шундан сўнг қон таҳлили топширилган, чақалоқнинг қони қони қуюқ чиққан. 

“Шу анализларни аслида шифохонага келганимизда олишлари керак эди, қўли кўкаргандан кейин эмас”, – дейди она.

Чақалоқнинг ҳолати ўнгланавермагач, у сунъий нафас бериш аппаратига уланган. 10 кунча бу аппаратга уланган ҳолда ётган, антибиотиклар таъсир қилмай, иситмаси тушмаган. У вақтда қизалоққа бўлим мудири С.А. қарашни бошлаган.

“Бўлим мудири болангиз Covid бўлган, шунинг асорати деб айбни ўзимизга қўйяпти. Коронавирус бор-йўқлигини болницада 24 кун ётганимиздан кейин текширишди, бошида қилиши керак бўлган ишларни кеч бошлашди”, – дейди она.

Чақалоқнинг бувиси таъкидлашича, қизалоқнинг аҳволи ўнгланавермагач шифокорлар унда юрак пороги борлигини айтишган:

“Бу ҳолатдан кейин шифокорлар томонидан набирамга юрак пороги билан туғилиш ташхиси қўйилиб, шу сабаб қон оқими бузилгани ва қўл томирларга капелница қўйилган вақтда тромб ҳосил бўлгани маълум қилинди. Ваҳоланки, чақалоқ дунёга келганда унда юрак пороги билан туғилиш ҳолати аниқланмаган, буни туғуруққа масъул бўлган шифокор ҳам тасдиқлайди”, — дейди Ҳадичанинг бувиси

Қизалоқнинг қўлидаги кўкаришлар тарқамай, ҳолат оғирлашиб кетаверганидан кейин шаҳардаги бошқа малакали шифокорлар ҳам уни кўрикдан ўтказган. Аммо кеч қолингани, ампутация қилинмаса, боланинг ҳаётини сақлаб қолиш иложсиз бўлишини маълум қилган.

“Москва ҳамда Ҳиндистондаги шифокорларга ҳам алоқага чиқдик. Тошкентдаги жуда кўп докторлар келди. Ҳамма бир хил жавоб берди: ампутация… ампутация. Балки, даво чоралари ўз вақтида тўғри қўлланилганда, набирамнинг қўлини сақлаб қолардик”, – дейди буви. 

Чақалоқнинг уйдагилари ампутация амалиётини ўтказишга ноилож кўнган, 8 январ куни қизалоқ операция қилинган.

 “1 соат ўтар-отмас қизимни чап қўлсиз қилиб олиб чиқиб беришди. Ҳозир аҳволи, яхши лекин бутун умрга ногирон бўлиб колди. “Минздрав” ишни ёпти-ёпти қилмасдан, айбдорларга жазо беришини сўрардим. Бўлим мудиридан тортиб ҳамширасигача. Ишини тўғри қилмагани учун ишдан бўшатилишларини талаб қиламан, ахир бу ёқда яна юзлаб боланинг ҳаёти ҳақида гап кетяпти”, – дейди она.

Онанинг сўзларига кўра, қўлдаги кўкаришлар чақалоққа ангиокaтетер нотўғри қўйилгани ва томирда кўп “подкожа” кетганидан бўлиши мумкин, сабаб тўлиқ аниқланмаган, текширувлар олиб борилмоқда. Суд-тиббиёт экспертизаси ҳали тақдим этилмагани йўқ.

Бувисининг айтишича, чақалоқнинг кесилган қўли экспертиза қилдириш учун сўралганда унинг оила аъзоларига берилмаган.

Kun.uz мухбири ҳолат юзасидан иккинчи томоннинг ҳам фикрини олишга уринди. Бироқ қизалоқни даволаш жараёнида иштирок этган барча шифокорлар ҳолат юзасидан прокуратурага чақирилгани боис улар билан боғланишнинг имкони бўлмади.

Соғлиқни сақлаш вазирлиги томонидан эълон қилинган расмий муносабатда бемор Тошкент шаҳар 1-сон болалар клиник шифохонасига тана ҳароратининг кўтарилиши, йўтал, хириллаш, ҳансираш, безовталик ва ҳолсизлик каби шикоятлар билан олиб келингани, дастлабки текширув давомида унга “Шифохонадан ташқари пневмония” ташхиси қўйилгани, беморнинг аҳволи шифокорлар томонидан оғир дея баҳоланиб, дарҳол муассасанинг чақалоқлар ва чала туғилган чақалоқлар патологияси бўлимига госпитализация қилингани таъкидланган.

“Бўлимда гематолог, ангиохирург, болалар жарроҳи, неонатал-жарроҳ каби тор соҳа мутахассислари томонидан ўтказилган қўшимча ва клиник тиббий текширувлар натижасида беморга “Асосий: Сепсис. Септицемия. Cовид-19 этиологияли шифохонадан ташқари пневмония” асосий ташхиси ҳамда “Туғма юрак нуқсони-бўлмачалараро тўсиқ нуқсони” касаллиги ва унинг асорати бўлган “Нафас етишмовчилиги 1-2-даража. Юрак-қон томир етишмовчилиги 1-2-а даражаси” ташхиси қўйилган.

Муассасада даволаниш вақтида қизалоқда “Чап томонлама елка артерияси тромбоемболияси, чап қўл ва чап қўл панжасида қон айланишининг 3-а даражали ўткир бузилиши, полиорган етишмовчилиги” кузатилган.Шу боис бемор ҳаётини сақлаб қолиш мақсадида ампутация ўтказишга қарор қилинган ва ота-онасининг розилиги билан унда жарроҳлик аралашуви амалга оширилган”, – дейилади расмий муносабатда.

Айни пайтда мазкур ҳолат Cоғлиқни сақлаш вазирлиги томонидан тўлиқ назоратга олиниб, вазиятга аниқлик киритиш мақсадида хизмат текшируви ўтказилмоқда. Якуний хулосалар бўйича жамоатчиликка қўшимча маълумот берилиши айтилган. Чақалоқнинг аҳволи ҳозирда барқарор ҳолатда.

Kun.uz воқеалар ривожини кузатиб боради.