Немис фермерлари оқсил касаллиги катта зарар келтириши ҳақида огоҳлантирди

Германия фермерлар иттифоқи (DBV) раҳбари Йоахим Руквид мамлакатда оқсил касаллиги тарқалиши катта иқтисодий зарар келтиришидан огоҳлантирди. «Ушбу касалликнинг тарқалиши муҳим иқтисодий оқибатларга олиб келиши сабабли чорвачилик фермаларимиз учун жуда жиддий зарба», деди Руквид Mediengruppe Bayern медиа-гуруҳига Берлинда «Яшил ҳафталик» қишлоқ хўжалиги ярмаркасининг очилиши муносабати билан 17 январ, жума куни берган интервюсида.

Руквиднинг сўзларига кўра, чорвачилик учун содир бўлган воқеа оқибатларини баҳолаш ҳали қийин, аммо «зарар жуда катта бўлади». Шу билан бирга, ушбу вирус одамлар учун хавф туғдирмаслиги муҳим, «у истеъмолчилар учун мутлақо зарарсиздир», деб таъкидлади DBV раҳбари. У расмийларни «касаллик тарқалишини ҳар қандай йўл билан ушлаб туриш учун ҳамма нарсани қилишга» чақирди. «Ҳозир бу биринчи рақамли устувор вазифа», деди Йоахим Руквид ва Германия ҳукумати ҳамда федерал ерлардан «ҳал қилувчи чоралар»ни кутишини қўшимча қилди.

Берлиндаги "Яшил ҳафталик" ва оқсил касаллиги

16 январ оқшомида 89-"Яшил ҳафталик"нинг тантанали очилиш маросими бўлиб ўтди. Унда Германия озиқ-овқат ва қишлоқ хўжалиги вазири Жем Ўздемир ва Берлин бургомистри Кай Вегнер иштирок этди. Эртаси куни эрталаб кўргазма ташриф буюрувчилар учун тўлиқ очилди. Бу йил 60 мамлакатдан 1500 га яқин экспонент иштирок этмоқда. Ташкилотчилар 26 январгача ярмаркага 300 мингга яқин ташриф буюрувчи келишини кутмоқда.

Ветеринария хизмати билан келишилган ҳолда, бу сафар "Яшил ҳафталик"да айрим ҳайвонлар (қорамол, қўй, эчки, алпака ва бошқалар) намуналари бўлмайди. Бу чора Германияда сўнгги 35 йил ичида биринчи марта зоонозлар (ҳайвонларнинг юқумли касалликлари) гуруҳидан ўткир, ўта юқумли вирусли касаллик бўлган оқсил авж олгани билан изоҳланади.

Ўтган ҳафта Бранденбург федерал еридаги чорвачилик фермасида наслдор буйволлар подасида оқсил касаллиги аниқланган. Касалликдан учта буйвол нобуд бўлгани хабар қилинган. Илгари Германияда ҳайвонларнинг оқсил касаллиги билан касалланиш ҳолатлари 1988 йилда қайд этилган.