Грозев: ГРУ Ғарбдаги диверсиялар учун «университет» яратди

Россия ҳарбий разведкаси (Россия Қуролли кучлари Бош штабининг Бош бошқармаси, собиқ ГРУ) Москва ва Санкт-Петербургда хорижликларни Ғарб давлатларида қўпорувчилик фаолиятига тайёрлаш учун ўқув марказларини яратди. Der Spiegel ва The Insider нашрларининг суриштирувлар билан шуғулланувчи журналисти Христо Грозевнинг 17 январ, жума куни чоп этилган «Котрикадзе Дзядко» YouTube-каналига берган интервюсида «диверсантлар университети» деб аталувчи ташкилотнинг ташкил этилиши муҳокама қилинди.

Унинг сўзларига кўра, таҳсил олувчиларнинг аксарияти Россия томонидан босиб олинган ҳудудлардан, хусусан, Херсондан келган Украина фуқаролари. Булар жиноий ўтмиши бўлган одамлар ва улар ГРУ ходимлари томонидан диверсияларга ўргатилмоқда, дея аниқлик киритди Грозев. Иккинчи тоифага Лотин Америкасидан келган одамлар киради, уларнинг баъзилари илгари Россияда ўқиб, ишга қабул қилинган, бошқалари, масалан, венесуэлаликлар ва кубаликлар эса бундай тайёргарликдан ўтиш учун «махсус келганлар». Учинчи тоифага Афғонистондан келганлар киради. 2023-2024 йилларда ГРУ «жуда кўп» афғон ёшларини Европада қочқинлар ниқоби остида диверсиялар учун ёллаган, дея хабар беради журналист.

«Диверсантлар университети» учта сабабга кўра яратилган

Журналист бундай ўқув марказлари ташкил этилишининг бир қанча сабабларини санаб ўтди. Биринчидан, бир қатор суриштирувлар натижасида хорижда ишлаган 100 га яқин россиялик ГРУ жосуслари фош этилди. Иккинчидан, Украинадаги уруш пайтида баъзи агентлар ўлдирилган ёки яраланган. Учинчидан, ГРУнинг бутун дунё бўйлаб «иккинчи ҳарбий атташе ёки иккинчи котиб» мақоми ортига яширинган «дипломатик» ходимлари санкциялар туфайли энди Ғарб давлатларига бора олмайди.

Грозев ГРУ томонидан ўқитилаётган агентлар сонини айтмади, лекин бу иш натижалари, хусусан, Полша ва Чехиядаги саботаж, шунингдек, Европадаги DHL логистика марказларида содир бўлган ёнғинлар билан боғлиқ ҳодисаларни ўз ичига олганини таъкидлади.