Парламент сайловлари бўйича 39 давлатда сайлов участкалари очилади

Марказий сайлов комиссиясининг (МСК) бугун бўлиб ўтган мажлисида Ўзбекистоннинг чет давлатлардаги дипломатик ва бошқа ваколатхоналари ҳузурида сайлов участкаларини тузишга оид масала кўриб чиқилди.

Мажлисда Ташқи ишлар вазирлиги томонидан E-saylov ахборот тизими орқали юборилган тақдимномага асосан МСКнинг хорижий давлатлардаги дипломатик ва бошқа ваколатхоналар ҳузурида сайлов участкаларини тузиш бўйича қарори қабул қилинди.

Жумладан, Ўзбекистоннинг 39 та чет давлатлардаги дипломатик ва бошқа ваколатхоналари ҳузурида 56 та сайлов участкалари тузилиши белгиланди.

Хусусан, 29 давлатда (Австрия, Озарбойжон, Афғонистон, Беларус, Белгия, Британия, Венгрия, Миср, Исроил, Ҳиндистон, Индонезия, Эрон, Испания, Италия, Кувайт, Латвия, Малайзия, Уммон, Покистон, Полша, Сингапур, Тожикистон, Таиланд, Туркманистон, Украина, Франция, Швейцария, Швеция ва Япония) биттадан, еттита давлатда (Германия, Қирғизистон, БАА, Саудия Арабистони, АҚШ, Туркия, Жанубий Корея) – иккитадан, Қозоғистон ва Хитойда - учта ва Россияда - еттита участка иш бошлайди.

Шунингдек, мамлакатнинг чет давлатлардаги дипломатик ва бошқа ваколатхоналари ҳузуридаги сайлов участкалари Тошкент шаҳри ҳудудига бириктирилди.