Косоводаги сайловларда бош вазир Куртининг ҳукмрон партияси ғалаба қозонди

Косовода 9 феврал, якшанба куни парламент сайловлари бўлиб ўтди. Associated Press агентлигининг дастлабки овоз бериш натижаларига таяниб хабар беришича, овозларнинг 73 фоизи ҳисоблаб чиқилганидан сўнг, бош вазир Албин Куртининг «Ўз тақдирини ўзи белгилаш» партияси 42 фоиз овоз тўплаган ҳолда етакчилик қилмоқда. Мухолифатдаги Косово Демократик партияси ва Косово Демократик лигаси мос равишда 22,7 ва 17,9 фоиз овоз билан иккинчи ва учинчи ўринларда. Тўртинчи ўринда яна бир мухолиф куч – собиқ бош вазир Рамуш Харадинайнинг «Косово келажаги учун алянси» 7,6 фоиз овоз билан.

«Халқ ғалаба қозонди. «Ўз тақдирини ўзи белгилаш» ғалаба қозонди. Биз кейинги ҳукуматни тузадиган ғолиб кучмиз», — дея Курти сўзларини келтиради AP. Айни пайтда, вазирлар маҳкамасини мустақил равишда шакллантириш учун ҳукмрон партия 50 фоиз овоз олиши керак, акс ҳолда «Ўз тақдирини ўзи белгилаш» Косовонинг Ғарб билан муносабатларини қайта кўриб чиқмоқчи бўлган мухолифат кучлари билан коалицияга кириши ва Сербия билан музокараларни қайта бошлаши керак бўлади.

Сайлов куни мамлакат прокуратураси овоз бериш натижаларига таъсир ўтказмоқчи бўлган саккиз киши ҳибсга олингани ҳақида хабар берди. Бироқ кейинроқ полиция «сайлов жараёни тинч ва жиддий ҳодисаларсиз ўтганини» маълум қилди. Овоз бериш жараёнини Европа Иттифоқидан 100 нафар, Европа Кенгашидан 18 нафар, халқаро ва маҳаллий ташкилотларнинг 1600 нафарга яқин вакили кузатди. Косоводаги парламент сайловларида икки миллионга яқин сайловчи овоз бериш ҳуқуқига эга эди. Косовонинг 120 ўринли парламенти озчилик гуруҳлари учун 20 та ўринни кафолатлайди, улардан 10 таси, овоздан қатъи назар, этник серблар учун ажратилган.