Milliy xavfsizlik va mudofaa kengashi (MXMK) Ukraina hukumatiga Oliy radaga mamlakatda diniy tashkilotlarning «Rossiyadagi ta’sir markazlari bilan bog‘liq» faoliyatining taqiqlanishi to‘g‘risidagi qonun loyihasini taqdim etishni topshirdi. Bu haqda Ukraina prezidenti Volodimir Zelenskiy 1 dekabr, payshanba kuni vatandoshlarga qilgan kechki murojaatida Milliy xavfsizlik va mudofaa kengashining o‘sha kuni bo‘lib o‘tgan «Ukraina va tajovuzkor davlatning alohida diniy doiralari o‘rtasidagi aloqalar ko‘plab faktlariga» bag‘ishlangan yig‘ilishi yakunlarini izohlar ekan, ma’lum qildi.

Zelenskiyning qo‘shimcha qilishicha, Etnosiyosat va vijdon erkinligi bo‘yicha davlat xizmatiga Ukraina pravoslav cherkovi (UPCh) boshqaruvi to‘g‘risidagi nizomni Moskva patriarxati bilan cherkov-kanonik aloqasi borligi va zarurat tug‘ilganda «qonunda nazarda tutilgan choralarni ko‘rish» uchun diniy ekspertizadan o‘tkazish topshirilgan.

Ukraina prezidentining so‘zlariga ko‘ra, shuningdek, Kiyev-Pechersk milliy tarixiy-madaniy qo‘riqxonasi hududida joylashgan mulkdan diniy tashkilotlar foydalanishining qonuniy asoslari va shartlariga rioya etilishini tekshirishni ta’minlashga qaror qilindi.

Milliy xavfsizlikni ta’minlash bilan shug‘ullanuvchi barcha organlarga Rossiya maxsus xizmatlarining Ukrainadagi diniy muhitdagi qo‘poruvchilik faoliyatini aniqlash va bunday harakatlarga qarshi kurashish bo‘yicha chora-tadbirlarni kuchaytirish topshirildi, deyiladi Zelenskiyning kechki nutqida.

«Biz davlatimiz uchun mustaqillikning to‘laqonli bo‘lishini ta’minlaymiz. Xususan, ma’naviy mustaqillik. Biz hech qachon hech kimga Ukraina qalbi tubida imperiya qurishiga yo‘l qo‘ymaymiz», - dedi Ukraina prezidenti.

Shu bilan birga, u «ukrainaliklar va davlatning huquq va qonuniy manfaatlarini haqiqatda himoya qilish imkonini beradigan» Etnosiyosat va vijdon erkinligi bo‘yicha davlat xizmatini isloh qilishga va’da berdi.

Kecha, 1 dekabr kuni ertalab Ukraina Xavfsizlik xizmati ("SBU") Karpatortidagi UPCh MP Mukachevo yeparxiyasining Muqaddas Kirillo- Mefodiy ayollar monastiri hududida rossiyaparast materiallarni aniqlagani haqida xabar bergan edi.

Noyabr oyining oxirida "SBU" Pochayev diniy seminariyasi va Ukraina pravoslav cherkovining Ivano-Frankivsk yeparxiyasi hududida ham ko‘plab Ukrainaga qarshi materiallarni aniqladi. Xususan, ukrain xalqi va uning tili mavjudligini, shuningdek, Ukrainaning davlatchilik huquqini inkor etuvchi adabiyotlar topilgan.

23 noyabr kuni "SBU" xodimlari uchta pravoslav monastirida: Kiyev-Pechersk lavrasida, Koretskiy muqaddas Troitsk monastirida va Roven viloyatidagi Ukraina pravoslav cherkovining Sarnensko-Polessk yeparxiyasi binolarida tintuv o‘tkazdi. Ukraina maxsus xizmati ma’lumotlariga ko‘ra, ushbu chora-tadbirlarning maqsadi «ibodatxonalardan "rus dunyosi" markazlari sifatida foydalanishning oldini olish» bo‘lgan.

Ukraina Xavfsizlik xizmati tomonidan Ukraina pravoslav cherkoviga qarshi ish ochilishiga sabab ijtimoiy tarmoqlarda Kiyev-Pechersk lavrasida xizmatlardan birida rus tilidagi - «qo‘ng‘iroq Rossiya uzra suzib yuribdi, ona Rus uyg‘onyapti» so‘zlari bo‘lgan qo‘shiq qanday yangrayotgani tasvirlangan video bo‘ldi. Kiyev-Pechersk lavrasida voqea keyinchalik tashrif buyuruvchilarning o‘z xohishi bilan izohlandi. Shu bilan birga, xizmatni o‘tkazgan ruhoniy ishdan olib tashlandi.