Ukrainadagi urush, so‘nggi ma’lumotlar

• Yevropa Ukrainaga yana 9 mlrd yevro va «Marshall rejasi» taklif etmoqda. Yevrokomissiya rahbari Ursula fon der Lyayyen Ukraina ayni vaqtda oldingi chiziqda turib yevropacha qadriyatlarni muhofaza qilayotgani, Yevropa esa urush davomida ham, undan keyin ham ukrainlarni qo‘llab-quvvatlashda davom etishini aytgan. Rossiya armiyasi bosqini oqibatlarini bartaraf etish uchun YeIga ittifoqchilar ham yordam berishi zarurligi ta’kidlab o‘tilgan.
• Ukraina armiyasi bosh shtabi ukrain harbiylari Xarkov yaqinidagi Dementeyevka qishlog‘ini ozod etishgani haqida xabar berdi. Bu qishloq Xarkovdan shimoldagi trassa bo‘yida joylashgan, bu trassa chegaraga va undan Belgorodga olib boradi.
• Rossiya vitse-premeri Marat Xusnullin Ukraina yerlari annexiasi istiqbollari haqida gapirdi. U Ukrainaning bosib olingan Melitopol shahrida turib barcha egallangan hududlarda (Xusnullin ularni ozod etilgan hududlar deb atadi) Rossiya rubl aylanmasini yo‘lga qo‘yishni rejalashtirgani, Zaporojye AES esa Rossiya uchun ishlashini aytib o‘tdi.
• BMT Inson huquqlari bo‘yicha Oliy komissari boshqarmasi ma’lumotlariga ko‘ra, urush boshidan buyon Ukrainada tinch aholi vakillaridan 3778 kishi halok bo‘lgan (so‘nggi bir kunda qurbonlar soni 26 kishiga oshgan), 4186 kishi yaralangan (so‘nggi bir kunda 124 kishi).
• Rossiya mudofaa vazirligi so‘nggi bir kunda «Azovstal»da yana 771 nafar ukrainalik harbiy asir tushganini xabar qildi. Vazirlik ma’lumotiga ko‘ra, dushanba kunidan buyon taslim bo‘lgan ukrainalik harbiylar soni 1730 nafarni tashkil etgan, shundan 80 nafari yaradorlar. Ukraina tomoni birinchi kuni 260 dan oshiq, ikkinchi kuni 300 nafardan oshiq harbiylar zavod hududidan chiqqani, ularning 100 dan ortig‘i og‘ir yaradorlar ekani haqida xabar bergandi, uchinchi kuni qancha harbiy taslim bo‘lgani xabar qilinmadi. Rossiyaning Rostov oblastidagi nashrlar esa «Azov» polkining asirga tushgan jangchilari Donetskdan Rostov va Taganrogdagi qamoqxonalarga olib ketilgani haqida xabar tarqatdi.

Quyida 18 may kuni Ukrainaning turli hududlaridan olingan suratlar.

Donbass shimoli

Mariupol 

Kiyev

Xarkov oblasti