SSV matbuot xizmati 7 yanvar kuni O‘zbekistonga kelgan xorijiy davlat fuqarosidan COVID-19ning yangi omikron shtammi aniqlangani haqida xabar berdi.

Respublika maxsus komissiyasining navbatdagi yig‘ilishida mamlakatda koronavirus infeksiyasi bilan kasallanish holatlari ortib borayotgani, ushbu kasallikka qarshi zarur choralar ko‘rishni davom ettirish lozimligi qayd etildi.

Komissiya qarori bilan jamoat joylarida niqob taqish, ijtimoiy masofa saqlash, shaxsiy gigiyena qoidalariga qat’iy rioya etish ustidan nazorat kuchaytiriladi. Bunda, barcha tashkilot, korxona va muassasalarda, yirik savdo majmualari, supermarketlar, ko‘ngilochar muassasalarning kirish qismida niqobda bo‘lish, ijtimoiy masofa saqlash, tana haroratini o‘lchash amaliyotiga qat’iy rioya etilishi ta’minlanadi.

Sog‘liqni saqlash vazirligi, O‘zbekiston musulmonlari idorasi, Din ishlari bo‘yicha qo‘mitaning fuqarolar Umra ziyoratlaridan qaytishida koronavirusga PZR yoki ekspress testni Saudiya Arabistoni hududida o‘zbek tibbiyot xodimlari tomonidan olinishi va manfiy natijasiga muvofiq kirib kelishini tashkil etish to‘g‘risidagi taklifiga rozilik berildi.

Aholini to‘liq emlash va buster doza bilan emlash ishlari jadallashtiriladi.

Vazirlik va idora rahbarlari, tashkiliy shaklidan qat’i nazar, barcha tashkilotlarda ishchilarning emlangandan so‘ng ish joylariga kiritishga ruxsat beriladi. Mazkur tartibni buzgan tashkilot rahbarlariga nisbatan qonun hujjatlarida belgilangan tartibda qat’iy chora ko‘riladi.

Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi. Ushbu tadbirlarga OTM rahbarlari shaxsan mas’ul etib belgilanadi.

Shuningdek, Respublika maxsus komissiyasi qarori bilan 2022 yil 15 yanvardan boshlab quyidagi tartib joriy qilinmoqda:

• xorijiy davlatlardan O‘zbekiston Respublikasiga tashrif buyuruvchilar kelishidan kamida 48 soat oldin topshirilgan koronavirus infeksiyasiga PZR test natijasi bo‘yicha manfiy ko‘rsatkichli ma’lumotga ega bo‘lishi; 
• koronavirus infeksiyasiga PZR test natijasi bo‘yicha manfiy ko‘rsatkichga ega ma’lumotnoma bo‘lmaganda, aeroport, temir yo‘l vokzallari va chegara o‘tkazish punktlarida tashkil etilgan koronavirus infeksiyasiga ekspress test topshirishi shart.

Vazirlik, idoralar va boshqa davlat tashkilotlari hamda xo‘jalik birlashmalarida mamlakatda amal qilayotgan karantin cheklovlari sharoitida aholi salomatligini ta’minlash, mamlakatda epidemiologik vaziyat barqarorligini saqlash maqsadlarini ko‘zda tutib, turli tadbirlar tashkil etish taqiqlandi.

Eslatib o‘tamiz, omikron shtammi 2021 yil noyabrida Janubiy Afrika Respublikasida aniqlangan va keyinchalik Yevropa va Osiyo davlatlariga tarqalgandi.

2021 yil dekabr oyidan boshlab AQSh, Daniya, Janubiy Koreya, Buyuk Britaniya, Rossiya, Isroil, Niderlandiya, Fransiya, Yaponiya, Hindiston kabi bir qator davlatlarda yangi shtamm keng tarqalib, epidemiologik vaziyat keskinlashib borayotgani munosabati bilan bir qator qo‘shimcha karantin cheklovlari joriy etilgan.