Toshkentda 16 yoshli qiz sodir etgan YTHda 14 yoshli bola vafot etdi

O‘zbekiston 12:02 / 29.09.2020 53773

Joriy yilning 27 sentabr kuni soat 20:00larda Toshkent shahar Uchtepa tumani 35-uy qarshisida, 2004 yilda tug‘ilgan, haydovchilik guvohnomasiga ega bo‘lmagan Sh.N. “Spark” rusumli avtomobilni boshqarayotgan bo‘lgan.

O‘zbekiston Respublikasi IIV YHXBB axborot xizmati xabariga ko‘ra, u o‘zidan oldinda harakatlanib ketayotgan haydovchi, 1982 yilda tug‘ilgan I.A. boshqaruvidagi “Neksiya” rusumli avtomobilni quvib o‘tayotgan vaqtida ushbu avtomashina bilan to‘qnashib, boshqaruvni yo‘qotgan va qarama-qarshi bo‘lakka o‘tib ketib, qarshisidan kelayotgan haydovchi, 1974 yilda tug‘ilgan A.M. boshqaruvidagi “Lasetti” rusumli avtomobil bilan to‘qnashgan.

Natijada, “Spark” rusumli avtomobil yo‘lovchisi, 14 yoshli A.N. shifoxonaga olib ketilayotganda yo‘lda vafot etgan. Ushbu avtomobil haydovchisi, 16 yoshli Sh.N. va “Lasetti” rusumli avtomobil haydovchisi, 46 yoshli A.M. tan jarohati olib shifoxonaga yotqizilgan.

Mazkur YTH yuzasidan Toshkent shahar IIBB huzuridagi TB tomonidan O‘zbekiston Respublikasi Jinoyat kodeksining 266-moddasi 2-qismi (odam o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, hozirda tergov harakatlari olib borilmoqda.

“Barcha haydovchilardan belgilangan qoidalarga amal qilishlarini, ota-onalar haydovchilik guvohnomasiga ega bo‘lmagan farzandlarining avtomobil boshqarishiga ruxsat bermasliklarini so‘rab qolamiz”, - deyiladi ma'lumotda.

Ko‘proq yangiliklar: