NYT: AQSh bombardimonchilarni Yaqin Sharqqa jo‘natishda chalg‘ituvchi taktikadan foydalandi

B-2 bombardimonchi samolyotlarining ikki guruhi Missuri shtatidagi aviabazadan turli yo‘nalishlarga jo‘natildi, deb yozadi The New York Times Pentagondagi manbalarga tayanib.

Guruhlardan biri transponderlar yoqilgan holda g‘arbga Guam tomon uchib ketdi, shunda ularni tijorat sun’iy yo‘ldoshlari orqali kuzatish mumkin edi.

Yetti bombardimonchi samolyotdan iborat ikkinchi guruh GBU-57 bunkerga qarshi bombalar bilan to‘liq yuklangan va aniqlanmaslik uchun transponderlari o‘chirilgan holda Eron tomon sharqqa uchgan.

Harbiylar rejasiga ko‘ra, bu Eron tomonini Amerika zarbalarining vaqti va yo‘nalishi haqida chalg‘itishi kerak edi.

NYT, shuningdek, AQSh harbiylari va razvedka xodimlari Eron tomonidan qo‘llab-quvvatlangan guruhlar AQShning Iroq va Suriyadagi bazalariga hujum qilishga tayyorlanayotgani alomatlarini qayd etganini yozadi. 

Nashrning ta’kidlashicha, hozircha AQSh harbiylariga qarshi hech qanday chora ko‘rilmagan va Iroq rasmiylari guruhlarni hujumlardan tiyilishga ko‘ndirishga urinmoqda.