Parkentda uch bola cho‘kib ketgani yuzasidan jinoiy ish ochildi

«Parkensoy» kanalidagi suv oqim bo‘ylab hosil bo‘lgan suv havzasida taqiqlovchi belgilar o‘rnatilmagani, uni bartaraf etish choralari ko‘rilmagani aniqlangan.

Foto: Videodan kadr

Toshkent viloyati Parkent tumanida voyaga yetmagan uch nafar bola suv havzasida cho‘kib, vafot etgani holati yuzasidan tergovga qadar tekshirish harakatlari o‘tkazildi.

Bosh prokuratura matbuot xizmati ma’lum qilishicha, tekshirishda mutasaddi tashkilotlar tomonidan «Parkensoy» kanalidagi suv oqim bo‘ylab hosil bo‘lgan, chuqurligi taxminan 2 metrni tashkil etgan, 20 ga 40 m2 o‘lchamdagi suv havzasida ta’qiqlovchi belgilar o‘rnatilmagani, aholi o‘rtasida tushuntirish ishlari olib borilmagani, su’niy tashkil topgan suv havzasini bartaraf etish choralari ko‘rilmagani aniqlandi.

Ish bo‘yicha isbotlanishi lozim bo‘lgan barcha holatlarni tekshirish hamda bir qator tergov harakatlari o‘tkazish lozimligini inobatga olib, Jinoyat kodeksining 116 (Kasb yuzasidan o‘z vazifalarini lozim darajada bajarmaslik) va 207 (Mansabga sovuqqonlik bilan qarash) moddalari bilan jinoyat ishi qo‘zg‘atildi.

Barcha zarur tergov harakatlari o‘tkazilganidan so‘ng ish bo‘yicha qonuniy to‘xtamga kelinadi.

#Parkensoy #Parkent tumani