Toshkentda Xalqaro tijorat sudi ochiladi

Maxsus Xalqaro tijorat sudi mavjudligi O‘zbekistonda investorlar uchun to‘liq shart-sharoit yaratilayotganini anglatishi ta’kidlanmoqda.

Toshkentda Xalqaro tijorat sudi (TICC) ochiladi, bu haqda Toshkent xalqaro investitsiya forumida ma’lum qilindi.

Investitsiyalar, sanoat va savdo vazirligi xabariga ko‘ra, uning ochilishi xorijdan kelgan investorlarga umumiy huquq asosida sudga murojaat qilish imkonini beradi.

«TICC tashkil etilishi investorlarga tanlash imkoniyatini beradi. Arbitraj, xo‘jalik sudi va hozir maxsus Xalqaro tijorat sudi mavjudligi O‘zbekistonda investorlar uchun to‘liq shart-sharoit yaratilayotganini anglatadi», dedi Toshkent xalqaro arbitraj markazi direktori Diana Bayzakova.

Toshkent davlat yuridik universiteti rektori Islombek Rustambekov kelgusida umumiy huquqni biladigan advokatlarga talab kutilayotgani va O‘zbekiston bunga tayyor bo‘lishi kerakligini ta’kidladi.

Shuningdek, O‘zbekistonda xo‘jalik sudlari haddan tashqari yuklangani, faqat o‘zbek va rus tillarida ishlayotgani, chet el qonunchiligidan deyarli foydalanmasligi ta’kidlandi. Chet ellik advokatlar fuqarolik va litsenziya talablari tufayli mijozlarni himoya qila olmaydi.

Ta’kidlanishicha, TICC mamlakatning butun sud tizimini yangilashga turtki beradigan yuridik laboratoriyaga aylanishi mumkin.

#forum #investitsiya #Xalqaro tijorat sudi