O‘zbekistonda Volkswagen avtomobillari ishlab chiqariladi

Volkswagen kompaniyasi «O‘zavtosanoat» tarkibidagi Alyans Auto bilan hamkorlikda O‘zbekistonda SKD usulida avtomobillar ishlab chiqarishni boshlaydi. Tarkibiy qismlar nemis kompaniyasining Xitoydagi ishlab chiqarish bazasidan yetkazib beriladi. Ommaviy ishlab chiqarishni boshlash 2025 yilning IV choragiga mo‘ljallangan.

Foto: Volkswagen

Volkswagen UzAuto bilan hamkorlikda O‘zbekistonda avtomobil ishlab chiqarishni boshlaydi. Bu haqda Germaniya kompaniyasining savdo va marketing bo‘yicha rahbari Martin Sander LinkedInʼdagi sahifasi orqali ma’lum qildi.

Kelishuvga ko‘ra, avtomobillarni ishlab chiqarish SKD formatida (butlovchi qismlarni yirik uzellar asosida yig‘ish texnologiyasi) amalga oshiriladi.

Ishlab chiqarish jarayoni ilgari Jizzakh Auto nomi bilan tanilgan va O‘zavtosanoat tarkibiga kiruvchi Alyans Auto bilan hamkorlikda yo‘lga qo‘yiladi. Aynan shu kompaniya O‘zbekistonda Volkswagen, Škoda va Jetta avtomobillarining rasmiy distribyutori hisoblanadi.

«Bizda sakkizta zamonaviy sedan va sig‘imli yo‘ltanlamas avtomobillari mavjud. Bu aynan o‘zbekistonlik xaridorlar izlayotgan narsadir», - deya ta’kidlagan Sander.

Uning qo‘shimcha qilishicha, tarkibiy qismlar Volkswagen’ning Xitoydagi ishlab chiqarish bazasidan yetkazib beriladi. Bu kompaniyaga logistika xarajatlarini qisqartirish va uglerod izini kamaytirish imkonini beradi.

Ommaviy ishlab chiqarishni boshlash 2025 yilning IV choragiga mo‘ljallangan.

#Volkswagen #ishlab chiqarish #avtomobil