FXX Qozog‘iston fuqarolarining Rossiyaga kirishini taqiqlay boshladi

Qozog‘istonliklar Rossiyaga kirishda tobora ko‘proq rad javobini olmoqda. Bunday holatga «Adolat yo‘li» birlashmasi ijrochi direktori Didar Smagulov duch keldi. Facebook ijtimoiy tarmog‘ida yozishicha, Rossiya chegarasida FXX chegara xizmati unga mamlakatga kirish umrbod taqiqlanganini ma’lum qilgan. Smagulov ochiqchasiga Ukrainani qo‘llab-quvvatlaydi: u ijtimoiy tarmoqlarda Rossiyani bosqinchisi deb atagan, Ukraina shiorlari va bayrog‘ini joylashtirgan. 2024 yilda u AQSh Davlat departamentining sobiq rahbari Entoni Blinkendan korrupsiyaga qarshi kurashda faoliyati uchun mukofot olgan.

Rossiyaga kirishga qo‘yilgan taqiq masalasi Telegram hamda Facebookʼda faol muhokama qilinmoqda va Smagulov bunga duch kelgan yagona odam emas. Qozog‘istonlik Yerjan Bateshovning aytishicha, uni Ostonada samolyotga chiqarishmagan. Uning so‘zlariga ko‘ra, chipta rasmiylashtirgan va to‘lovni amalga oshirgan bo‘lishiga qaramay, reysga ro‘yxatdan o‘tishda familiyasi yo‘lovchilar orasida bo‘lmagan.

«Reyslarga xizmat ko‘rsatish bo‘yicha kassaga o‘tishimni so‘rashdi. U yerda menga Rossiyaga kirishim uchun taqiq qo‘yilganini ma’lum qilishdi», — deb yozadi Bateshov. U ijtimoiy tarmoqlarga Ukraina Qurolli kuchlarining Rossiya neft obektlariga hujumlariga oid roliklarni joylagan. Qozog‘istonlik yana bir fuqaro Eliya Axetovaning ma’lum qilishicha, unga 2022 yil martidan boshlab Rossiyaga kirish 10 yil muddatga taqiqlangan.

Ta’kidlanishicha, qozoqlarning Rossiyaga kirishiga qo‘yilgan taqiq Ukraina fuqarolariga qo‘llangani kabi ommaviy xarakterga ega emas. Ukrainaliklarning RF hududiga kirishga urinishlari so‘roqlar, chegarada puxta tekshirishlar, shuningdek, 20 yildan 50 yilgacha bo‘lgan muddatga rasmiy kirish taqiqini olish holatlarini keltirib chiqaradi.

Smagulin va boshqa qozog‘istonliklarga qo‘yilgan taqiq muammosiga Qozog‘iston TIV rahbari o‘rinbosari Akan Rahmetullin izoh berdi. «Sabablar har xil bo‘lishi mumkin va odatda bu mamlakat sabablarni oshkor qilmaslik bo‘yicha to‘liq suveren huquqqa ega», — deydi u. Vazir o‘rinbosari o‘zida Qozog‘iston fuqarolarining Rossiyaga kirishi taqiqlangan ro‘yxat yo‘qligini ma’lum qildi. Aprel oyida Rossiyaga kirishning yangi qoidalari kuchga kirgan va har bir chet el fuqarosi uchun raqamli profil shakllantirilmoqda.