Putinning maslahatchisi SSSR huquqiy jihatdan hamon mavjud ekanini aytdi

Putinning maslahatchisi Anton Kobyakov Sankt-Peterburg xalqaro yuridik forumida SSSR huquqiy jihatdan hozir ham mavjud ekanini iddao qildi.

Uning so‘zlariga ko‘ra, SSSR 1922 yilda Xalq deputatlari qurultoyi tomonidan tashkil etilgan va aynan shu qurultoy tomonidan tarqatib yuborilishi kerak edi. Biroq, 1991 yilda bunday bo‘lmagan. Shu sababdan uning o‘rnida mustaqil davlatlar tashkil etishning huquqiy tartibi buzilgan va bu «SSSR hali ham qonuniy ravishda mavjud» ekanini anglatadi. Kobyakovning ta’kidlashicha, shundan kelib chiqqan holda bu «Ukraina bilan urushni «ichki jarayon» deb atash imkonini beradi».

SSSR hamon mavjud ekani mashhur fitna nazariyasi bo‘lib, uning atrofida bir nechta harakatlar, masalan, o‘zini «SSSR fuqarolari» deb atagan, Rossiya pasportidan foydalanishdan, armiyada xizmat qilishdan va kommunal xizmatlar uchun pul to‘lashdan bosh tortgan bir necha guruhlar paydo bo‘lgan. 2022 yilda Rossiya Adliya vazirligi Samara viloyat sudi qarori bilan «SSSR fuqarolari» harakatini ekstremistik tashkilotlar ro‘yxatiga qo‘shdi. Shu yili sud uning rahbari Sergey Taraskinni ekstremistik tashkilot tuzish moddasi bo‘yicha 8 yilga ozodlikdan mahrum qildi. Xuddi shunday qarorlar boshqa viloyatlarda ham qabul qilindi.

Rossiya prezidenti Vladimir Putin SSSR parchalangani va ushbu hodisaning oqibatlaridan afsusda ekanini bir necha bor aytgan, xususan, 2005 yilda buni «XX asrning eng katta geosiyosiy falokati» deb atagan va SSSR tarqatilishi haqidagi Belovejsk kelishuvlari Konstitutsiyaga zid ekanini ta’kidlagan.

Anton Kobyakov 2005-2012 yillarda prezident ma’muriyatida turli lavozimlarda ishlagan, 2012-2014 yillarda prezident ma’muriyatini boshqargan, 2014 yildan esa prezident maslahatchisi lavozimini egallab kelmoqda.