Polsha 10 mingta Warmate kamikadze dronlarini sotib oladi

Mamlakat Mudofaa vazirligi uchuvchisiz uchish apparatlari xaridi bo‘yicha WB Electronics bilan shartnoma imzoladi.

Foto: Reuters

Polsha o‘z armiyasi uchun 10 mingga yaqin Warmate kamikadze dronlarini xarid qilish bo‘yicha shartnoma imzoladi. Bu haqda mamlakat mudofaa vaziri Vladislav Kosinyak-Kamish ma’lum qildi.

Qayd etilishicha, shartnoma respublikaning qurollanish bo‘yicha agentligi va WB Electronics ishlab chiqaruvchisi o‘rtasida tuzilgan.

Mudofaa vazirining so‘zlariga ko‘ra, WB Electronics — uchuvchisiz uchish qurilmalarini ishlab chiqarish bo‘yicha Yevropadagi eng yaxshi kompaniya. Kosinyak-Kamish, shuningdek, dronlarning zamonaviy harbiy mojarolardagi inqilobiy rolini qayd etib o‘tdi.

Ta’kidlanishicha, kelishuv 2035 yil oxirigacha davom etadi va keyingi bitimlar doirasida mingga yaqin dron to‘plamlarini, jumladan, eng yangi versiyalarini yetkazib berishni nazarda tutadi.

Polsha armiyasi 2017 yildan beri Warmate dronlaridan foydalanib kelmoqda, o‘shanda hududiy mudofaa qo‘shinlari uchun kichik partiyalarni yetkazib berish bo‘yicha birinchi shartnoma tuzilgan edi. 2022 yilda esa qurollanish agentligi kompaniya bilan taxminan 12,5 million dollarlik ikkinchi shartnomani tuzgandi.

#dronlar #Polsha